Од 21 јуни до 13 јули, 7 градови во Турција ќе бидат домаќини на 24 фудбалски репрезентации составени од играчи до 20 години, а помеѓу нив нема да ги има репрезентациите на Бразил и Аргентина. Ова е прво светско фудбалско натпреварување во историјата на ФИФА на кое нема да настапат овие две репрезентации кои важат за велесили во фудбалот.
Репрезентацијата на Бразил е актуелен светски шампион во оваа конкуренција до 20 години и има освоено 5 титули, а Аргентина има 6 титули од ова натпреварување кое последен пат го освои во 2007-та година. Сепак тие оваа година не изборија пласман преку континенталните квалификации.
Во моментов во Аргентина се одржува првенството на Јужна Америка за играчи до 20 години каде домаќините и репрезентацијата на Бразил беа елиминирани уште по групната фаза со по 1 победа и 1 нерешена по 4 натпревари.
И на сениорите не им оди баш најдобро. Бразил во моментов се наоѓа на 18-та позиција на ФИФА ранг листата што е најнизок пласман во историјата, а Аргентина последен пат се има израдувано на трофеј пред 20 години кога триумфираа на Копа Америка.
