Динамо Загреб вечерва од 21 часот ќе го пречека норвешкиот шампион Викинг во рамки на баражот за пласман во Лига на шампиони. Следната недела ќе има реванш во Норвешка, а подобриот од двомечот ќе игра во богатата Лига на шампиони и ќе заработи околу 30 милиони евра.
Водител од норвешката државна телевизија ТВ2 присутен на „Максимир“, направил репортажа од срамниот изглед на трошниот стадион.
Новинарот снимил прилог и ги прикажал дотраените делови на стадионот. На западната трибина каде што ќе стојат гостинските навивачи пронашол парче паднат бетон а на едно место и падната цигла.
Норвешкиот репортер раскажува и дека стадионот на Динамо Загреб е стар повеќе од 100 години, речиси 115 години и дека во 2020-та година источната трибина е затворена од безбедносни причини поради нарушување на статиката од тогашниот земјотрес.
Нему му била чудна и оддалеченоста на гостинската трибина од теренот - измерил 45 метри до теренот. Забележал и изгорена подлога на атлетската патека од фрлени бакљи од гостински навивачи.
Видео прилогот на норвешкиот репортер погледнете го тука
Динамо Загреб на почетокот на 2027-ма година ќе се пресели во улицата Крањчевиќева на малото стадионче на НК Ломотива каде ќе игра додека не се изгради новиот стадион. Во меѓувреме се реновира и стадионот на Локомотива „Крањча“ која ќе има 11.163 покриени седечки места и ќе ја задоволува четвртата категорија на УЕФА стандардите.
Дотраениот и стар „Максимир“ ќе се руши во 2027-ма година а изградбата на новиот и модерен стадион со капацитет од 35.000 гледачи ќе трае до 2029-та или 2030-та година.
