Навивачите на Борусија и со шест седишта повеќе се на коњ

Додека кај нас уште на некои стадиони се гледа прволигашки фудбал на бетон, па после газот грчки им збори, Германците се до толку прецизни во работата што прават вест и од вакво нешто. Ние може да им се смееме, ама тие стварно ќе усреќат шестмина.

Додека се крчка стартот во Русија и се бројат последните саати до отворањето кое сите го чекаме со душа, од Бундеслигата ни доаѓаат вакви вести:

„Експанзија на Сигнал Идуна во Борусија, најголемиот германски стадион ќе стане поголем“,

И кога ќе помисли човек дека кој знае што ќе му прават на стадионот, клубот уствари објавува проширување на капацитет од 81.359 на 81.365 седишта. Тоа е зголемување за цели ШЕСТ седишта повеќе.

Значи по реновирањето, Борусија Дортмунд за националните натпревари ќе може да прими 81.365 гледачи, а за меѓународните 66.099 или 248 повеќе.

🛠 #Infotweet: Durch Umbauarbeiten im @SIGNALIDUNAPARK ergeben sich für die Saison 2018/19 neue Kapazitäten:

🇩🇪 National: 81.365
🌍 International: 66.099 pic.twitter.com/z6JKWYFrYD
— Borussia Dortmund (@BVB) June 11, 2018

Колку и да го гледа некој ова како несфатлив градежен зафат и поместување, со оглед на тоа што 50.000 луѓе се на листа на чекање за сезонски билет, за навивачите на Борусија секое седиште плус е добродојдено.

Зборуваме за најверните фанови во Германија и едни од најверните во светот со кои Милионерите може да се пофалат дека станаа првиот германски клуб со рекордно забележано присуство од 81.000 навивач, кое се случи во сезоната 2015/2016.

Според официјалните бројки од сезоната 2016/2017, Бундеслигата бележи најголема посетеност во Европа со просечни 40.693 гледали, пред Премиер лигата која имаше 35.838. Потоа следуваа Ла Лига (27.609), Серија А (22.177) и Лига 1 (21.202).

Домаќинот на Мундијалот, Русија таа сезона држеше во просек по 11.415 гледачи, нешто помалку од Португалија (11.838).

И на меѓународна сцена никој не може со навивачите на Борусија.