По 17 одиграни кола Јувентус се наоѓа на првата позиција со 41 поен, 7 повеќе од Интер на втората и 8 повеќе од Лацио на третата позиција.
Во досегашниот тек од сезоната Јувентус загуби 10 поени од максималните 51 и сите против екипи од горниот дел на табелата. Јувентус ги победи Рома и Наполи, а ремизираше со Фиорентина и Лацио и загуби од Интер и Милан.
Од максимални 18 поени од овие 6 натпревари, Јувентус освои само 8, за разлика од минатата сезона кога во првиот дел од сезоната против истите противници освои 14 од 18 поени. Лани Јуве беше немилосрден со фаворитите, а губеше поени против помалите екипи. Минатата сезона по 17 одиграни кола имаше 5 нерешени, од кои 2 беа со екипи како Болоња и Каљари, а оваа сезона Јувентус доминира против послабите екипи и на 11 натпревари оствари 11 победи.
Една од причините за овие резултати е слабата форма на напаѓачите. Јувентус има втор најдобар напад во лигата, но само 15 од вкупно 36 гола се постигнати од напаѓачите Кваљарела, Џовинко, Вучиниќ и Матри, а Бендтнер постигна 0.
Проблем кој сериозно би можел во иднина да влијае на резултатите е распоредот на Јувентус. Минатата сезона тие беа фокусирани само на лигата затоа што не учествуваа во ниту едно европско натпреварување, а оваа сезона очекуваат тешки натпревари во следната фаза од Лигата на шампиони и тежок распоред во Серија А.
На Јувентус му претстојат 6 дуели против екипи од горниот дел на табелата од кои во досегашниот тек на сезоната тие губеа поени. Во Торино ќе гостуваат Милан и Фиорентина, а Јувентус ќе им гостува на Интер, Рома, Лацио и Наполи.
