Емотивниот кам бек на Маркизио на Јувентус Стадиум

Нема навивач на Старата Дама кој не го почитува Клаудио Маркизио. Детето на Јуве кое викендов отпатува во Торино за да го гледа дербито против Рома. Колку беше возбуден што повторно се враќа кај своето семејство, говори фактот што едвај врза две реченици.

Ако одите на Википедија кај Клаудио Маркзио ќе забележите еден ваков податок 1993 – 2018, само во Јувентус. Тоа се вкупно 25 години стаж во еден клуб, 12 во младинскиот сектор и уште 13 во сениорскиот.

Лојалност која посебно се цени кај навивачите кои во нивните срца имаат направено посебно место за Клаудио. Јувентус беше местото каде порасна, дебитираше, славеше, тагуваше и едноставно четврт век му беше секојдневие.

Таму почна да ја тркала топката на 7 години, а си замина дури на 32. За него тоа беше болно заминување, но се разделија пријателски, секој на своја страна, а со срцето на едно место.

Во пресрет на божиќните празници, Маркизио сакаше да биде блиску до своите па од Русија каде игра за Зенит, замина во Италија на средбата Јувентус – Рома. Пред стартот на мечот клубот спреми посебна најава за него, како и простор и време да се поздрави со навивачите.

Музиката застана откако тој го зема микрофонот, но емоциите го совладаа. Маркизио кажа само збор два и од голема возбуда пушти солзи.

„Возбуден сум бидејќи мислам на тоа што ви го дадов и на тоа што ми го дадовте вие“.

Куси и едноставни зборови, кои допираат до публиката со која славеше 7 Скудета, како и пад и кам бек од втора во прва лига. Тој е еден од оние кои не го оставија клубот на цедило кога требаше да се соочи со казната наречена Серија Б.