Секој викенд преку 600 милиони луѓе во 200 земји преку ТВ екраните ги следат натпреварите од англиската Премиер лига. Англичаните отсекогаш биле горди на својата лига која си ја нарекуваат „најголемото шоу на планетата", но колку е таа англиска?
Во 11 од 20 клубови од Премиер лигата мнозинските акции се во сопственост на странци. Британците се газди само во Евертон, Норич Сити, Њукасл, Стоук, Свонси, Тотенхем, ВБА, Виган и делумно во Вест Хем.
Прв странец кој „повлече нога" во англискиот фудбал беше Мохамед Ел Фајед од Египет кој во 1997-та година го купи контролниот пакет акции во Фулам. Во 2003-та Роман Абрамович го купи Челси, а во 2005-та и Манчестер Јунајтед „падна" во рацете на Американецот Малколм Глејзер.
Странски газди раководат со Арсенал, Астон Вила, Челси, Фулам, Ливерпул, Манчестер Сити, Манчестер Јунајтед, КПР, Саутемптон, Сандерленд, а на листата може да се додаде и Вест Хем каде најмногу акции (35%) се во сопственост на исландска компанија.
Не е само Премиер лигата во сопственост на странци. Од 24 клубови во англискиот Чемпионшип (втората по ранг лига во Англија), дури во десет од нив доминантната сопственост ја имаат странски газди.
