- По неколкумесечна дебата, Парламентот на Германија го усвои контроверзниот закон за воена служба, со кој канцеларот Фридрих Мерц планира да го зголеми воениот состав на 260.000 активни војници, од сегашните 183.000, и уште 200.000 резервисти.
- Берлин го укина задолжителниот воен рок во 2011 година. Со новиот закон, сите мажи во Германија родени по 1 јануари 2008 година ќе бидат повикани на медицински прегледи заради утврдување на воена способност.
- Служењето на воениот рок ќе биде на доброволна основа. Покани ќе им бидат испратени на сите 18-годишни момчиња и девојки. Момчињата ќе мора да се произнесат дали сакаат да служат воен рок или не, а девојките не мора да одговараат на поканата, освен ако не изразат желба.
- Ако на доброволна основа не биде пополнет посакуваниот број војници, ќе се примени втората фаза, која мора да биде одобрена со гласање во Бундестагот. Ако бројот на военоспособни момчиња го надминува потребниот број, регрути ќе бидат избирани по случаен избор со лотарија.
- Италија, Белгија и од неодамна и Франција ги проширија програмите за доброволно служење воен рок, со цел да се зајакнат одбранбените капацитети. Нордиски и балтички земји, како и Хрватска, ја вратија задолжителната воена обука.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
