Bookbox › Набрзинка

„Чајанка“ - изложба на Емилија Сандиќ во „Шума“

2 ноември 2026

Во среда, 4 ноември, со почеток од 19 часот, Концепт кафе Шума ќе биде домаќин на уникатна фотографска изложба насловена „Чајанка“, чија авторка е истакнатата млада визуелна уметница Емилија Сандиќ. Настанот се организира во рамките на активностите на Зрно фестивал, посветен на промоција и истражување на алтернативните фотографски процеси.
Серијата фотографии е настаната во процес на истражување на ретката и фасцинантна техника mordançage — алтернативна фотографска постапка во која фотографската емулзија, под дејство на специфични хемикалии, се разградува, се подигнува од хартијата, се разлева и се трансформира – слично како што се подготвува чај. Преку оваа материјална промена, Сандиќ го истражува деликатниот однос помеѓу контролата и случајноста, како и меѓу стабилниот и променливиот слој на фотографијата.
Со изборот на мотивот — растенија од кои се подготвува чај — во центарот на фокусот е ставен процесот на инфузија: моментот во кој врелата вода ја покренува трансформацијата, извлекувајќи боја, трага и мирис од сувата материја.

извор

Недела на јапонски филм во Скопје и Битола

1 ноември 2026

Од 4 до 10 ноември 2026 година, во Кинотеката во Скопје ќе се одржи Недела на јапонски филм, со шест остварувања што ја претставуваат разновидноста на јапонската кинематографија. Програмата опфаќа семејни драми, трилер, приказна за младоста, анимација и историска драма, а на 11 ноември ќе продолжи во Центарот за култура во Битола. Сите проекции се бесплатни.
Програмата ќе биде отворена на 4 ноември (среда) во 20 часот во Кинотека со „Чекор“, во режија на Кен Иизука — трогателна приказна за татко кој, по ненадејната смрт на сопругата, сам ја одгледува својата ќерка. Филмот ги следи нивните заеднички години, исполнети со предизвици, блискост и постепено соочување со загубата.

Подетална програма на линкот.

извор

Почнува „Еуродрам“ во Скопје: 60 учесници од 28 земји

27 октомври 2026

Со промоција на книгата „Зад мене белина“ од австрискиот театарски и оперски режисер Мартин Кушеј, вечерва (27.10.) во 18.30 часот во барот „Бистро“ на Театар Комедија, ќе почне работниот дел на Генералната асемблеја на „Еуродрам“ – Европската мрежа за драма и превод. Книгата на македонски јазик ја преведоа Дарко Јан Спасов и Горан Додевски, а за делото ќе зборуваат Тина Махкота, Ѓорѓи Јолевски и авторот Мартин Кушеј.
На настаните до 1 ноември ќе учествуваат 60 драмски автори, преведувачи, режисери, драматурзи, издавачи и театарски професионалци од 28 земји. Манифестацијата се одржува во знакот на 25-годишнината од основањето на мрежата, а програмата опфаќа сценски читања, промоции на книги, преведувачка работилница, панел-дискусии и театарски претстави.
Еден од значајните настани ќе биде промоцијата на „Каталог на македонски драми во избор на Еуродрам, 2001–2026“ од Иван Додовски. Изданието содржи преглед на 32 избори со 30 различни драми од 18 македонски автори. Каталогот е на англиски јазик и е наменет за преведувачи, режисери, издавачи, истражувачи и други професионалци заинтересирани за македонското драмско творештво.
Манифестацијата ја организира „Еуродрам“, мрежа на повеќе од 300 театарски професионалци од светот, во партнерство со Театар Комедија – Скопје, кој е главен домаќин. Јавната програма ќе се одвива на повеќе локации, меѓу кои Театар Комедија, Европска куќа – Скопје, „Лабораториум“ и книжарницата „Литература.мк“ во „Дајмонд мол“.

Целата програма по денови тука

извор