Мравките и луѓето имаат нешто заедничко - начинот на кој водат војни

Модерните општества повеќе личат на заедници на мравки отколку на нашите најблиски роднини, на пример на шимпанзите. Ниту еден мајмун не гради патишта, нема сообраќајни правила, не развива инфраструктура, не учествува во сложена тимска работа и не врши ефикасна поделба на трудот. А мравките го прават сето ова, и повеќе.

Општествата на сите живи суштества имаат организациски императиви кои зависат од големината, а само луѓето и одредени социјални инсекти имаат популации кои можат да бројат милиони. Заедницата на шимпанзите има стотина членови, и не се занимава со прашања на јавно здравје, за разлика од некои мравји метрополи, кои имаат „санитарни чети“ кои се грижат за хигиената. Без оглед дали се формирани од интелигентен ум (луѓето) или од генетско наследство (мравките), одредени елементи треба да бидат исполнети пред голем број поединци да можат да живеат заедно и хармонично во тек на долг период.

Лошата страна е што колку што е поголема групата, толку поагресивни и поекстремни можат да бидат реакциите кон аутсајдерите. И ова е една од необичните заеднички црти на луѓето и социјалните инсекти - војувањето со оние кои не ѝ припаѓаат на групата.

„Војна“ е термин кој опишува различни видови конфликти помеѓу животните и раните луѓе, а може да вклучува мали или еднострани напади, ограбување и сл. Војување во денешна смисла на зборот, како „концентриран ангажман на една група против друга група, во која секоја од страните ризикува целосно уништување“, почнало дури кога човечките општества пораснале доволно за да порасне и обемот и интензитетот на агресијата. До тогаш голем дел од судирите биле повеќе симболички отколку опасни, а смртните случаи не биле толку бројни колку во модерните војни. Такви се на пример „војните“ на Нова Гвинеја, каде племиња од неколку стотина членови организираат церемонијални судири во кои фрлаат копја и стрели кон непријателските линии, со тоа што целите се заштитени од дрвени штитови. И тука судирот завршува.

Овие „не-борби“ од страна на биолозите Берт Холдоблер и Едвард О. Вилсон (авторот на славната „Себичниот ген“) се споредени со подеднакво ритуализираните конфликти помеѓу помалите колонии медни мравки, чии групи можат да достигнат до неколку илјади. Тие се хранат со термити, па штом две колонии дојдат до истиот плен, мравките се собираат на „терен за турнир“, каде работниците од секоја колонија се заобиколуваат едни со други додека стојат високо качени на задните нозе. Главно победува групата со повисоки припадници, без некој посебен судир.

Има и други стратегии за да се одбегне вистинска војна. Некои колонии мравки реагираат на напади од појаки непријатели со тоа што туркаат камења врз влезот на мравјалникот за да го заштитат, техника која ја применувале и древните жители на Кападокија во Турција. Кога работничка од одредени видови мравки од Борнео контактира со непријател, таа толку силно си го стега телото што почнува да испушта токсична жолта течност од внатрешна жлезда. Натрапникот умира пред да може да избега и да извести за локацијата на гнездото на „бомбашот-самоубиец“.

Сите војни во вистинска смисла на зборот оттаму се водат од големи општества. Величината на популацијата на која мравјите и човечките општества се префрлуваат од напади со низок ризик и ритуализирани борби во целосно војување е проценета на околу 10.000 индивидуи. Агресијата обично достигнува епски нивоа во општества од стотина илјади или повеќе. Така, аргентинската мравка, инвазивен вид кој контролира цели региони долж јужна Калифорнија и други делови од светот, секоја недела има милиони жртви. Без пиштоли и бомби, овие мравки при тепањето ја користат само силата на нивните тела.

Сепак наспроти тоа да се кријат зад камења како мравките од Еквадор, луѓето можат да одберат да воспостават сојузништва, што за мравките е невозможно. Токму стремежот кон мир е она што го одделува човештвото од другите видови.

(од нова книга на Марк В. Мофет, биолог, под наслов „Човечкиот рој: подемот, опстојувањето и падот на нашите општества“)

15 мај 2019 - 19:09