Главните директори за технолошки развој од Мета, Палантир и Опен АИ ѝ се придружија на Армијата. Иако немаат никакво воено искуство, добија чин потполковник и ќе бидат ударната сила на Одредот 201.
Постои итна потреба за трансформација на Армијата. Овие момци ќе помогнат. Одредот 201 ќе биде одговорен за пошироки концептуални работи како привлекување, обучување и управување со таленти фокусирани на информатичката технологија во редовите на војската, изјави полковникот Дејв Батлер, портпарол на Генералштабот на Армијата.
Шјам Санкар од Палантир, Ендрју Босворт од Мета и Кевин Вејл и Боб Мегру од Опен АИ во воени униформи дадоа свечени заклетва за верност кон САД, по повод 250-годишнината од формирањето на Армијата на САД.
Во новоформираниот Одред 201 ќе служат како резервисти и високи советници, со скратено работно време од 120 часа годишно. Ќе бидат поштедени од класична обука, но ќе мораат да ги поминат основните тестови за физичка подготвеност и стрелање од огнено оружје. Нема да се фокусираат на конкретни проекти, туку ќе разгледуваат пошироки теми. Воспоставен е систем за да нема судир на интереси со нивните матични компании.
Одредот 201 ќе ја насочува Армијата за модерното војување со роботизирани возила и беспилотни летала управувани од далечина или од вграден систем со вештачка интелигенција. Овие оружја се потпираат на сложена мрежа од сателити, сензори и бази на податоци.
Стартапите како Андурил и Палантир веќе се наметнуваат како главни играчи во одбранбената индустрија. Мајкл Обадал, директор во Андурил, е номиниран за потсекретар на Армијата. Палантир со проект за вештачка интелигенција конкурира за договор со Армијата вреден над 1 милијарда долари.
Има многу преседани. Ова го правевме секогаш кога на нашата нација ѝ беа потребни врвни таленти. Разликата е што порано го правевме тоа во време на војна, а сега за да бидеме подобро подготвени и да спречиме војна, додаде Батлер.
