Уште важи тоа дека Земјата е загреана за речиси 1,2 степени Целзиусови од времето пред индустриската револуција и дека сме на пат да го кренеме затоплувањето над 1,5 степени Целзиусови.
„Меѓутоа малкумина знаат дека согорувањето фосилни горива не само што предизвикува глобално затоплување, туку и глобално ладење. Една од најголемите иронии на климатските промени е дека загадувањето на воздухот, кое уби десетици милиони луѓе, исто така спречи некои од најлошите ефекти на затоплувањето на планетата.
Малите честички од согорувањето јаглен, нафта и бензин ги одбиваат сончевите зраци и предизвикуваат создавање на облаци, на тој начин заштитувајќи ја планетата од сончевите зраци. Од 1980-те, овие честички неутрализираа меѓу 40 и 80 проценти од загревањето предизвикано од стакленичните гасови,“ пишува Вашингтон пост.
Како што човештвото фати да работи на тоа да е позелено, така бледее и ефектот на ладење, заради што температурите стануваат уште потопли.
„Тргнуваме од област на длабока, длабока несигурност.
Би можело цел степен на ладење да е маскиран,“ објаснува климатскиот истражувач Зик Хаусфатер.
Најголемиот дел од ладењето е последица на загадувањето од сулфурни аеросоли. Прво овие честички ги одбиваат сончевите зраци и ја заштитуваат Земјата, и второ постојните облаци ги прават посветли и послични на огледало и на тој начин ја ладат земјата.
Јагленот и нафтата се 1 до 2 проценти сулфур и кога тие се согоруваат сулфурот се шири низ атмосферата. Се работи за состојка која е поврзана со респираторни проблеми и други хронични болести, а на загадувањето на воздухот отпаѓаат 1 од 10 смртни случаи низ светот.
Изминативе децении САД, ЕУ, Кина и Индија активно работат на укинување и намалување на користењето на овие состојки, кои сега се и до 70% помалку застапени отколку во 2005. Освен држави, и големи глобални организации како Меѓународната организација за поморски транспорт нареди рестрикција на сулфурот дозволен во бродското гориво, кое е едно од највалканите горива што се користи во превозот. По ова загадувањето со сулфур диоксид од бродскиот транспорт веднаш падна за околу 80%.
„Овие одлуки спасија животи - според процени избегнати се околу 200.000 предвремени смртни случаи само во Кина. Меѓутоа тие исто така ги кренаа и глобалните температури. Научниците проценуваат дека промените во аеросолите од новите правила за бродови би можеле да придонесат со 0,05 до 0,2 степени Целзиусови затоплување во следните неколку децении.
Дел од истражувачите сметаат дека промените во правилата за бродското гориво на големо придонесуваат за минатогодишната рекордна горештина и дека аеросолите маскирале многу повеќе температури отколку што претходно се мислело,“ пишува Пост.
Научници од Универзитетот во Мериленд тврдат дека падот на нивото на аеросоли би можел да ја дуплира стапката на загревање во 2020-те, споредено со стапката од 1980. Ова пак е оспорено од друг научници, според кои ќе има зголемување на температурата, ама ни приближно толку обемно.
