Претседателот Доналд Трамп го известил својот најблизок круг соработници дека Илон Маск до крајот на мај ќе се повлече од својата улога шеф за кратење на администрацијата, кога ќе му заврши мандатот од 130 дена.
Претседателот е задоволен од Маск и неговата иницијатива за владина ефикасност, но и двајцата се согласуваат дека наскоро ќе биде време Маск да се врати во своите бизниси и да преземе споредна улога, изјавиле за порталот Политико тројца инсајдери од Белата куќа.
Тие тврдат дека високи функционери се фрустрирани од непредвидливоста на Маск и леснотијата со која врз себе навлекува бес од јавноста, што се манифестира не само со критики туку и со масовни палења на автомобили Тесла.
Причина повеќе за незадоволството е и неуспешната кампања на конзервативците за избор на судија од Висконсин во Врховниот суд на САД. Маск го поддржа конзервативниот судија со агитирање и со 20 милиони долари во „најскапата кампања за избор на судија во историјата“. Рекордно високиот одѕив на гласачите и победата на кандидатката поддржана од демократите се толкува и како израз на масовен отпор кон Маск.
Ова е остра промена во односот помеѓу Трамп и Маск, кој беше на највисоко можно ниво пред само еден месец. Довербата и вниманието што милијардерот ги доби од Белата куќа поттикна теории дека Трамп ќе најде начин да го задржи Маск и откако ќе заврши неговата мисија од 130 дена за кастрење на федералните трошоци. Висок функционер во Вашингтон тогаш оцени дека Маск најверојатно ќе ја добие улогата на неформален советник со отворен пристап до Белата куќа.
Како шеф на одделението за штедење Маск има специјален статус што привремено го ослободува од некои правила за етика и судир на интереси. Тие привилегии треба да завршат со крајот на мандатот, кон крајот на мај или почетокот на јуни.
За транзицијата на Маск и неговото одделение, Трамп говорел на состанокот на кабинетот на 24 март. По состанокот Трамп пред камерите го пофали Маск, а министрите ја поздравија неговата кампања за кастрење на бирократијата, иако во претходните недели остро ги бранеа своите министерства од „пилата“ на милијардерот.
Маск пред неколку дена самиот призна дека неговата мисија е речиси завршена.
Мислам дека ќе го исполниме најголемиот дел од работата потребна за намалување на дефицитот за 1 билион долари во определената временска рамка, изјави Маск за Фокс њуз.
Во понеделникот Трамп изјави пред новинари дека „во одреден момент Илон ќе сака да се врати во својата компанија“.
Тој така сака. Би го задржал додека можам, изјави Трамп.
