Сите нападнати банки - Иранската банка за развој на извозот, Мели, Садерат и Теџарат - се поврзани со Корпусот на Исламската револуционерна гарда (ИРГК) и ги има на списокот од американски санкции поради можно финансирање на нуклеарната програма на Техеран. Од вчера им се блокирани сите услуги со платежни картички.
Никој не презел одговорност, но Ронен Соломон, поранешен разузнавачки советник на израелското Министерство за одбрана, го издвојува како впечатливо времето во кое е извршен нападот.
Откако укинаа дел од финансиските санкции, САД, Израел и западните разузнавачки служби сега настојуваат да го спречат Техеран веднаш да има пристап до милијардите, со кои би можеле да ги рехабилитираат своите нуклеарни и ракетни програми, но и финансиски да го закрепнат Хезболах во Либан, за плати, оружје, обука и многу други работи, вели Соломон.
Согласно одредбите од Меморандумот за разбирање, САД му овозможија пристап на Иран до почетни 6 милијарди долари од неговите нафтени фондови што се чуваат во Катар. Трамп изјави дека со парите од тој фонд Иран ќе може да купува само храна и медицински материјали, и тоа исклучиво од САД.
Иран и никој друг ќе одлучи што да прави со тие пари, одговори иранскиот амбасадор во ОН, Али Бахреини.
Израел, кој воопшто не беше консултиран при составувањето на Меморандумот, ова го смета за директна закана за сопствената безбедност и поништување на ефектите од бомбардирањата на Либан и окупацијата на јужниот појас од својот сосед.
На Израел му е полесно да го спречи протокот на пари до Хезболах. Едноставно ги ликвидираше главните финансиери, како Хајтам Абдула Бакри. Многу посложено му е финансиски да го онеспособи Иран, кој има развиена банкарска мрежа со менувачници на валути и криптовалути и банкомати, вели друг извор на Телеграф од израелските безбедносни служби.
Трагите за нападот водат кон израелската група Predatory Sparrow, која прв пат се појави во 2021 година, нарушувајќи ја железничката мрежа на Иран. Потоа, во 2023 година ја нападна челичарницата Хузестан и исфрли од функција 70% од бензинските пумпи во Иран. Во 2025 година ја нападна банката Сепах и практично исчезна по 12-дневната војна во јуни.
Соломон вели дека Predatory Sparrow е поврзана со Единицата 8200 на Израелските одбранбени сили и служи како продолжена рака за разни саботажи.
Минатата година беше затворена, заедно со активностите на некои веб-страници и на Телеграм, за да се заштитат луѓето во неа. Но, мислам дека се враќа во живот затоа што ова се воени операции кои Израел може лесно да ги негира, додава Соломон.
Тој ги опишува кибернетските напади и хакерските упади како заеднички операции на службата за безбедност Мосад и Единицата 8200.
Во Мосад се луѓето, а во 8200 е технологијата. Ако сакате да влезете во банка, да добиете лозинка или друга помош од човек, ви треба Мосад, како што тоа го направи со УСБ-то уфрлено во нуклеарната постројка Натанц. Но, ако треба да направите нешто од далечина, тука е 8200, вели поранешниот советник за разузнавање.
Види и: Мајкрософт му одзеде моќно шпионско оружје на Израел
