Една година откако владата на Нов Зеланд го забрани користењето на мобилните телефони во училиштата, нема многу показатели дека е постигната посакуваната цел – да им се олесни на децата да се фокусираат на наставата на часовите за да можат полесно да го совладуваат материјалот.
Слични се и резултатите од анализите во други земји и региони што им ги забранија телефоните на децата во училиште – во Австралија, Франција, Британија, во Италија, Кина и во некои американско сојузни држави. Неодамнешно истражување во Британија, на пример, со кое биле опфатени 1.200 ученици, покажа дека немало значителна разлика во академските оценки или во благосостојбата помеѓу децата во училишта со строги забрани и во оние што дозволуваат носење мобилни телефони.
Првите искуства во Нов Зеланд се дека ставовите на учениците се измешани. Некои признаваат дека забраната помогнала да не им талкаат мислите и сметаат дека е добро да направат пауза.
Во спротивно, ќе бидеме на телефонот цел ден, цело попладне, цела ноќ, и тоа нема да биде здраво за нашите умови, рекло едно од децата на анкетата спроведена во 25 училишта.
На многу други забраната им создала нови проблеми. Некои се вознемирени зашто биле спречени да контактираат со родителите. Други се пожалиле на двојните аршини за учениците и за наставниците, кои можеле да користат телефони.
Има и ученици што воопшто не биле погодени, бидејќи нашле начини како да ја заобиколат забраната. Некои комуницирале преку воки-токи.
Највпечатливи се изразите на фрустрираност дека учениците воопшто не биле прашани што мислат пред да бидат воведени забраните. Никој не им ја објаснил целта на мерката и не ги предупредил на можните последици.
Се чини дека тие мислат дека ќе го решат проблемот ако едноставно забранат сè, се побунил еден ученик.
Да ги прашале, можеби ќе бил создаден поефикасен концепт. Некои ученици не гледаат причина зошто да немаат пристап до телефоните за време на одморите или паузата за ручек. Така, велат тие, ниту ќе им се одвлекува вниманието на часовите ниту ќе им биде спречена комуникацијата со родителите.
Истражување од Digital Wellness Lab го поддржува овој избалансиран пристап, нагласувајќи ја потребата за градење вештини меѓу децата, наместо да им се наметнуваат ограничувања. Заклучокот е дека тешко може да функционираат правила кои не важат подеднакво за сите и кои не се прифатени од оние што се најзасегнати.
Младите луѓе не се само пасивни корисници на технологијата. Тие активно решаваат проблеми. Тие сакаат да бидат дел од разговорот и дел од решението, се истакнува во истражувањето.
******
