„За мочуриште не можете да бидете сигурни дали е длабоко 10 сантиметри или еден метар“, објаснува биологот Ханс Јостен кој гарантира дека тешките оклопни возила не би можеле да поминат низ мочуришната област во североисточна Германија, позната како Кишофер Моор.
Холандскиот биолог верува дека обновувањето на исушените мочуришта и тресетишта е ефикасен начин да се држи Путин подалеку, а воедно е и голем чекор во борбата против климатските промени, со придобивки за биодиверзитетот, контролата на посевите и снабдувањето со вода.
Се проценува дека пресушувањето на мочуриштата произвело пет проценти од глобалните емисии на јаглерод. Кога тресетиштата се полнат со вода, тие престануваат да емитуваат CO₂ и на крајот повторно почнуваат да го задржуваат.
Водата се користела во одбранбени стратегии со милениуми. Прускиот генерал и воен стратег Карл фон Клаузевиц тврдел дека мочуриштата се едни од најсилните линии на одбрана. Водачот на Германите, Арминиус, ја користел мочуришната земја во Тевтобуршката шума за да ги победи Римјаните во решавачка битка на почетокот на новата ера. Холандија користела поплави во 16 и 17 век за да ги одбие шпанските и француските освојувачи.
И украинската војска ги користеше своите води како одбрамбен ресурс. Во првите денови од руската офанзива во 2022 година, тие уништија брана на реката Ирпин, на околу 20 километри од Киев, што значително ги забави руските сили, го запре нивниот напад од север и ги принуди да бараат други правци, објаснува украинскиот воен експерт Виктор Кевљук. Уништувањето на браната им даде време на Украинците да ја зајакнат својата одбрана на десниот брег на реката Ирпин, а водата и мочуриштата служеа како противтенковски ров.
Но, таквите почви можат да бидат опасни и за оние на кои треба да им користат. Во март, четири американски војници стационирани во Литванија загинаа кога нивното оклопно возило M88 Hercules од 63 тони се заглави во мочуриште во близина на границата со Белорусија.
Поголемиот дел од тресетиштата на ЕУ се концентрирани на границите на членките на НАТО со Русија и Белорусија - од финскиот Арктик преку балтичките држави и источна Полска. Кога би бил преплавен, овој терен би претставувал опасна стапица за воени камиони и тенкови кои, соочени со таква бариера, би биле принудени да одат по други правци.
