Со доаѓањето на Шеикот Мансур Бин Зајед Ал Нахјан во 2008 година, во Манчестер Сити започна нова ера, титулата во Премиер лигата им се врати по дури 44 години, а сега станаа и водечка моќна сила на глобално ниво, благодарение на новите газди кои не знаат што е тоа штедење пари.
Најдобро платени играчи во тимот на Сити се Јаја Туре, Серџо Агуеро и Карлос Тевез и со тоа „Граѓаните" го креваат просекот и се најплатен состав во светот во конкуренција на најбогатите 278 клубови од 14 лиги во 7 различни спортови од 10 земји. Просечната годишна плата на ѕвездите од Манчестер изнесува точно 5,239,750 фунти или 8,059,477 долари.
Минатата година на оваа листа прва беше Барселона, а веднаш потоа Реал Мадрид, но сега гигантите од Шпанија паднаа на третата и четвртата позиција веднаш по бејзбол тимот Лос Анџелес Доджерс кој своите играчи годишно во просек ги плаќа по 4,86 милиони фунти.
Во топ 5 најбогатите спортски клубови на планетата се наоѓа уште еден бејзбол тим од САД, а тоа е Њујорк Јанкес, а единствената екипа од НБА лигата во ова елитно друштво е Лос Анџелес Лејкерс кој се наоѓа на седмата позција.
На табелата составена од најбогати 12 клубови во светот, со исклучок на Манчестер Сити, останатите 7 фудбалски екипи се освојувачи на Лигата на шампионите во новиот милениум.
