Редари на италијанските стадиони најчесто се студенти, кои викендот го користат да заработат дневница која се движи од 30 до 45 евра. Сума која според нив е далеку помала од ризикот кој го носат големите натпревари.
Во Торино, нив ги одбира агенцијата Менпауер, која лани работела за Јувентус, а сезонава за „Биковите“. Процедурата да станеш редар не е тешка: Праќаш си-ви и посетуваш курс, еднаш годишно.
„Нè викаат од натпревар до натпревар и ако си добар те бараат пак, ако не чао пријатно“, вели Матео за Газета дело спорт.
„Во Торино заработуваме по 25 евра, а работиме од 12 до 17:30. Во Јувентус беше подобро, нè плаќаа по 37,5 евра. Работата на влезот е најтешка. По логика и по закон, полицијата треба да сноси поголема одговрност за тоа што се внесува внатре, но нивната работа најчесто ја вршиме ние, иако стојат до нас“, додава Матео.
Торинското дерби беше тензично, со многу инциденти пред, за време и после натпреварот. Редарите се жалат дека не можат да претресат и најдат сè што се внесува на трибините.
„Често е невозможно да ги претресеш сите, особено затоа што најопасните навивачи влегуваат последни, на крај, за да ги избегнат ригорозните контроли. Сепак, од кога сме ние овде инцидентите се намалени“, констатира Матео.
На некои им успева и планот кога под изговор дека местат кореографија, под столиците лепат бакљи за подоцна да го уживаат мирисот на пиротехника во текот на целиот натпревар.
