- Едно од најголемите и најжестоки дербија, шкотското Олд Фирм меѓу Ренџерс и Селтик веќе извесно време (2 меча лани и 2 годинава) се играше без присуство на гостински навивачи, поради огромен ризик од навивачки нереди.
- Шкотската фудбалска федерација соопшти дека од следната натпреварувачка сезона 2024/2025 Ренџерс и Селтик ќе можат да водат свои навивачи на гостинските стадиони кога ќе играат против вечниот ривал.
- Досега тоа беше оневозможено на последните 4 меча поради тоа што трибините не беа во целост одвоени и постоеше голем ризик од незапаметени нереди. Одлучено е за гостите да има по 5% од вкупниот капацитет на стадионот што значи дека околу 3.000 навивачи на Ренџерс ќе одат на „Селтик Парк“ и околу 2.500 „Келти“ ќе одат на „Иброкс“.
- Новак Ѓоковиќ објави дека негов нов тренер кој ќе го спрема за Австралија Опен и за некои други турнири е неговиот добар другар од детство и долгогодишен ривал на тениските терени Енди Мареј.
- Легендарниот шкотски тенисер ја заврши својата богата кариера на Олимписките Игри во Париз а сега ќе заплива во тренерски води и ќе соработува со Новак Ѓоковиќ.
- Србинот и Мареј во кариерата одиграа 36 меѓусебни дуели. Ѓоковиќ славеше на 25 меча а 11 пати подобар беше Мареј. Енди во кариерата освои две титули на Вимблдон и една на УС Опен а има и две олимписки злата кои ги освои во 2012 и 2016.
- „Возбуден сум што еден од моите најголеми ривали ќе биде со мене од иста страна на мрежата, овојпат како мој тренер. Се радувам што сезоната ќе ја започнам заедно со Енди и што ќе биде со мене баш во Мелбурн каде делевме многу исклучителни моменти во кариерата“, изјави Новак Ѓоковиќ.
- Во самиот финиш од мечот Романија - Косово во Лига на Нации, гостинските фудбалери во 90' минута кога сфатија дека немаат веќе шанса за прво место за кое им требаше победа од најмалку три гола разлика, при резултат 0-0 решија да го напуштат теренот поради тоа што домашните навивачи им скандирале „Косово е Србија“.
- УЕФА неколку дена го разгледуваше случајот, а на крајот пресуди Романија службено да го добие мечот со победа од 3:0. Косовскиот фудбалски сојуз е казнет и со 6.000 евра парична казна поради тоа што репрезентативците ги одбивале повиците на делегатот да се вратат на теренот и да го довршат мечот.
- Романија ќе мора да плати 128.000 евра и еден меч ќе мора да игра без присуство на публика поради односот на своите навивачи.
