- Англиските навивачи но и другите од Европа полека го разобличуваат митот за „Енфилд Роуд“ како стадион на кој има пеколна атмосфера. Ако тоа некогаш било така во ’80-те и ’90-те години, сега во последниве неколку години стадионот на Ливерпул е речиси како театар.
- После мечот Ливерпул - Вест Хем 5-1 од англискиот Лига Куп, синоќа тренерот на „црвените“ Јирген Клоп бил резигниран од атмосферата на трибините: „Не сум нималку среќен со атмосферата зад мене. Се прашував што тие сакаат? Ни треба Енфилд на нозе и тоа не само тогаш кога јас се карам со противнички тренер или што и да е. Ако не си во добро расположение, дај ја картата на некој друг“, искрено рекол германскиот тренер кој неколку пати досега апелираше до трибините на „Енфилд Роуд“ да се разбудат од летаргијата.
- За оваа изјава се ситат противничките навивачи кои велат: „Нема разлика меѓу Енфилд и Етихад“, „Само мит е тоа дека Енфилд имал некаква пеколна атмосфера“.
- За прв пат по 2010-та, кошаркарските прволигаши пред стартот на сезоната закажан за 5/6 октомври, се ослободени од плаќање котизација, откако КФМ потпиша едногодишен договор со телекомуникациска компанија М-Тел, кој ќе биде генерален спонзор за Првата машка кошаркарска лига.
- „Досега, лигата имала четири спонзори од основањето. По 14 години, се надеваме дека почнуваме една нова цел, а тоа е промовирање и привлекување на што повеќе спонзори во кошарката и воопшто во мак-спортот. Кога дојдовме, котизацијата беше 10.000 евра, ја намаливме на 8.000 евра, а сега ја остваривме една од главните амбиции и цели, тоа е да најдеме спонзор, кој во целост ќе ги покрива сите трошоци на клубовите. Нашите амбиции се да ја покриеме и женската лига и младинските лиги. Веќе сме во започнати преговори, има интерес и се надевам дека за брз период истото ќе може да го промовираме и во останатите шампионати“, изјави генералниот секретар на КФМ, Владимир Георгиевски
- Инаку кошаркарските прволигаши имаат огромни долгови кон Куќата на кошарката, кои во моментот се движат околу 200.000 евра, а тоа се должи на доцнењето на државната помош, односно ваучерите кои требаше да ги добијат уште во јануари.
- Само неколку дена по тешките инциденти во Кавадарци каде навивачи и официјални лица на фудбалскиот клуб Тиквеш мртви-ладни физички нападнаа официјални лица на Вардар па со предмет го погодија и помошникот судија (ФФМ им изрече блага казна да не играат на домашен терен), сега нов циркус во Неготино.
- По натпреварот од втора лига меѓу Вардар Неготино и Охрид Лихнидос, гостинскиот голман Андов бил нападнат и удрен од неофицијално лице кое упаднало на теренот без никаков проблем.
- „По завршување на мечот нашиот голман како и уште неколку наши фудбалери беа физички нападнати од неофицијални лица на теренот. Исто така и минатата сезона бевме сведоци на слични случувања во Неготино но немаше реакција од наша страна. Бараме сега реакција од одговорните лица во федерацијата“, стои во соопштението на Охрид Лихнидос.