Во незапаметена атмосфера пред 21.000 гледачи, Партизан ја освои АБА лига

Кошаркарите на Партизан се нови шампиони во регионалната АБА лига за сезоната 2024/2025. Црно-белите во финалната серија беа подобри од подгоричка Будуќност со 3-1 во победи. Синоќа во Белград ставија печат со триумф 90:75 пред повеќе од 20.000 свои навивачи кои направија френетична атмосфера.

Натпреварот започна со честа промена на водствата на двете екипи и после првите 10 минути резултатот на семафорот беше 26:26.

Партизан на полувреме водеше 48:44 по тројката на Стелинг Браун. Во вториот дел Партизан во трета четвртина носен од неверојатната поддршка направи огромна предност од 16 поени (65-49) и тука веќе прашањето на победникот беше решено.

Будуќност се обидуваше да се врати но црно-белите одново отидоа на 15+ поени предност па славјето во белградска „Арена“ почна пред време. На крајот конечни 90:75. Најефикасни кај Партизан беа Дејвис и Браун со по 18 поени, Карлик Џоунс имаше 17 поени а Бонга и Лундберг по 13 поени. Кај Будуќност Јоги Ферел со 23 поени беше прв стрелец, а Танасковиќ додаде 14.