Јокиќ ги растури Спарси и првиот пик на драфтот

Денвер Нагетс ја прекинаа серијата од два порази по ред со триумф над Сан Антонио од 132:120. Никола Јокиќ го повтори личниот сезонски рекорд на поени.

Двократниот МВП му одржа лекција по кошарка на првиот пик на драфтот, Виктор Вембанјама и му фалеше само една асистенција за да запише нов трипл дабл.

Србинот блесна со 39 поени, 11 скока и 9 асистенции, а солидна партија одигра и Вембанјама кој мечот го заврши со 22 поени и 11 асистенции.

Јокиќ шутираше 17/29 од поле и 5/5 од линијата за слободни фрлања за 34 минути поминати на паркетот, а најголемата помош ја доби од Мајкл Портер кој имаше 25 поени и Реџи Џексон 20.

По 17 одиграни натпревари, шампионот има 11 победи и се наоѓа на 4. место во Западната конференција.