Убедлив пораз од Хрватска, со Грузија за пласман понатаму

Иако Хрватска поведе со 3:0 па со 7:2 на самиот старт преку Богдановиќ и Томиќ, нашите репрезентативци се вратија во игра со неверојатната серија од 10:0.

 

Дамјан Стојановски и Владо Илиевски погодија за три и поведовме 12-7, по што домашниот селектор Перасовиќ нервозно реагираше и побара тајм-аут. Првата четвртина ја затворивме со наше водство 18:15.

 

Стипчевиќ ја крена Арената на нозе кога по неговите поени Хрватска израмни 23:23. Тој момент ни малку не им ги врза рацете на нашите кошаркари кои повторно поведоа со 27:23. Самарџиски го затвори полувремето кое заврши 32:30 за нашата селекција.

Добрата игра во првиот дел и шансата за победа како да ги подисплаши нашите кошаркари кои веќе на стартот од третиот период имаа неколку загубени топки и нереализирани напади по што Хрватска поведе 52:42.

Се обидуваа Симоновски и Костоски со тројки, но процентот на реализација не им беше сличен на оној вчерашниот, па Хрватска замина на највисоки 59:46. Следуваше тројката на Ѓуровски која како да ги налути домаќините кои направија серија 10:0 и се одлепија на недостижни 69:49.

До крајот од мечот, селекторот Србиновски им даде шанса на Брчков и Љубомир Младеновски, но Хрватите не застанаа и на крајот ги поставија конечните 73:55.

Најефикасни во нашата селекција беа Самарџиски со 10 поени и Дамјан и Војдан Стојановски со по 9 погодоци. Кај Хрватите, Шариќ прв стрелец со 15, а Бојан Богдановиќ уфрли 13 поени. Утре е денот Д за нашата селекција која игра против Грузија. Во случај да победиме ќе обезбедиме пласман во осминафиналето.