Фешта на Диего Марадона, Елмас го крена пехарот

Елиф Елмас и официјално стана вториот македонски фудбалер во историјата кој успеа да се искачи на пиадесталот во елитната Серија А. Огромен успех, има само 23 години.

Со головите на Осимен и Симеоне, Наполи ја совлада Сампдорија во последното коло со 2:0 и го запечати првото место убедливо со 90 бода и скор од 28 победи, 6 нерешени и 4 порази со гол разлика 77:28.

Неапол слави Скудето по трет пат во историјата, а Елиф Елмас стана вториот Македонец по Горан Пандев со ваков успех.

Македонскиот репрезентативец синоќа беше стартер по 13-ти пат сезонава и има 35 настапи на вкупно 38 кола. На сите натпреварувања има 46 настапи.

Сезоната ја завршува впечатливо со 6 гола и 3 асистенции, често пати на висина на задачата, секогаш со голема желба и жар на теренот за што добиваше пофалби од Спалети.

Го слави вториот трофеј откако ја игра четвртата сезона во Наполи после Купот на Италија во 2019/2020.