Авелино 1912 е скромен клуб од јужна Италија чии навивачи важат за едни од најверните и најжестоките на Апенинскиот полуостров. После цели 8 години повторно се враќаат во втора лига.
Во саботата Авелино победи 1:2 на гости кај Соренто и во моментов е прв на табела со 8 бода повеќе од второпласираниот тим во Серија Ц. Доволно за сигурен пласман во Серија Б и огромно славје на плоштадот во градот каде играчите дошле со отворен автобус.
Но дента кога победија против Соренто и славеа пласман, од Ватикан стигна веста за смртта на Папа Франциско кој почина на 88 годишна возраст.
Оваа вест повторно поврза една неверојатна симболика - тоа е шести пат во последните 70 години пласман на Авелино од понизок во повисок ранг да се поклопи со смрт или абдикција на Папата. Неретко во ист ден.
Италианските медиуми а особено народот од Кампања кој важи за посуеверен регион од останатите, се почесто зборува за таканареченото „проклетство на синкроницитет“ - односно феномен кој поврзува смрт на Папа со успесите на клубот Авелино.
ХРОНОЛОГИЈА:
1. 1958-ма: Авелино влегува во четврта лига - починал Папата Пиј XII
2. 1963-та: враќање во Серија Ц - починал Папа Иван XXIII
3. 1978-ма: прва и единствена промоција во Серија А во клупската историја - починале Папа Павле VI и Папа Иван Павле I (на престолот бил само 33 дена)
4. 2025-та: пласман во Серија Б - почина Папа Франциско.
Иако е јасно дека станува збор за чиста коинциденција, бројките им го засилуваат впечатокот на оние кои се занимаваат со вакви тривијални занимливости.
Во јануари 2025-та година токму Папата Франциско на официјален прием ја примил делегацијата на клубот Авелино во Ватикан, ги благословил и потпишал дрес на Авелино. Папа Франциско важеше за голем љубител на фудбалот и страствен навивач на аргентински Сан Лоренцо, и самиот од Аргентина.
