Вести › Набрзинка

Не се глупи некои што не им се оди на избори

20 март 2023

Македонците се најнесреќни луѓе на Балканот, покажува последниот извештај за среќата во светот на Институтот Галуп.
Се наоѓаме на 87-мото место од 137 земји и само неколку места нè делат од Украинците. Албанија на 83. место, Бугарија на 77. место, Босна и Херцеговина на 71. место, Грција на 58-мото, Србија на 45-тото, а Косово на 34-тата позиција.
Најсреќни земји во светот остануваат Финска и Данска, најнесреќни Авганистан и Либан.
Очекуваме владата брзо да реагира на оваа незавидна положба во која се наоѓа среќата со тоа што ќе донесе уредба и за нејзино смрзнување.

6 ноември 2026

Државниот секретар Марко Рубио ги отфрли шпекулациите дека размислува да ја напушти администрацијата на Трамп, со цел да ги задржи шансите за сопствена кандидатура за претседател во 2028 година.
Според извори на Блумберг, Рубио веќе разговарал со претставници во Белата куќа и бил замолен да остане.
„Отсекогаш ми беше план да работам за Трамп до крајот на неговиот мандат. Ја сакам работата“, изјави Рубио во интервју за „Њујорк тајмс“.
Белата куќа и Стејт департментот синоќа го отфрлија извештајот на Блумберг како „лажна вест“.
Рубио упорно одбива да одговори на прашањата дали планира да се кандидира за претседател на изборите во 2028 година. Неколку пати досега јавно го поддржа потпретседателот Џ.Д. Венс: „Тој би бил најдобриот кандидат“.

6 ноември 2026

Два месеци пред да му заврши мандатот, гувернерот на Калифорнија, Гевин Њусом ги преиначи сите 548 смртни казни во сојузната држава во доживотна робија без право на условен отпуст.
Одлуката е симболична, затоа што Њусом на почетокот на својот мандат во 2019 година воведе мораториум на извршување на смртни казни.
Калифорнија нема извршено смртна казна веќе 20 години, иако судовите продолжуваат да ја изрекуваат оваа казна за лица осудени за убиство и други тешки кривични дела.
На два референдуми, во 2012 и во 2016 година, жителите на Калифорнија со тесно мнозинство ги отфрлија предлозите за укинување на смртната казна.
Околу 2.100 затвореници во САД се соочуваат со погубување. Ако Уставниот суд на Калифорнија ја потврди одлуката на гувернерот, нивниот број ќе биде намален за една четвртина.