- Од Левица потсетуваат дека од МВР и од Оливер Спасовски нема коментар зошто станицата за технички преглед на компанијата „ВИА КОМЕРЦ Џемаљ“, во која бил регистриран автобусот на „Беса транс” и за која биле утврдени серија неправилности уште во август, добила решение за забрана на работата дури три дена по несреќата во ноември.
- Покрај тоа што нестручни лица извршувале прегледи на возила, компанијата не водела регистар на прегледани возила. Сепак, предлогот за забрана за работа на станицата министерот Оливер Спасовски не го потпишал, за на 5 октомври во станицата да пристигне автобусот, кој во ноември беше причина за ужасна трагедија.
- „Секојдневните одлуки на владиниот кадар и севкупната владина политика, се опасни по животите и здравјето на граѓаните и повикуваат на народна самоодбрана на физичкиот интегритет на секој поединец“, пишува во соопштението од Левица“.
- Новите преговори на делегациите на Вашингтон и на Киев биле посветени на идните граници помеѓу Украина и Русија. САД бараат од Киев да се откаже од целиот Донбас, дури и од териториите што сега ги контролираат украинските сили, за да прифати Русија да ја запре војната.
- Петчасовните разговори се одржале во Мајами, на приватен имот на главниот американски преговарач Стив Виткоф. Во делегацијата биле и државниот секретар Марко Рубио и зетот на претседателот Трамп – Џаред Кушнер. Украинскиот тим бил предводен од новиот главен преговарач Рустем Умеров, шефот на генералштабот Андрих Хнатов и вториот човек на разузнавањето Вадим Скибитски.
- Умеров денеска во Париз ќе го информира претседателот Володимир Зеленски за заклучоците од средбата, а Виткоф утре ќе му ги претстави на рускиот претседател Владимир Путин во Москва.
- „Беше интензивно, но не и негативно. Мораме да направиме сè за да помогнеме да успее мировниот план на САД, без да ја изгубиме нашата земја и да спречиме идна агресија. Главното прашање е дали руските намери се реални. Да видиме со што ќе се врати Виткоф од Москва“, изјавил член на украинскиот тим.
- Бенјамин Нетанјаху побара од претседателот на Израел помилување за обвиненија за поткуп и измама со што би се ставил крај на петгодишното судење за корупција. Верува дека тоа би било во „национален интерес“.
- „Канцеларијата на претседателот е свесна дека ова е вонредно барање кое носи значајни импликации“, се вели во соопштението на Исак Херцог. „По добивањето на сите релевантни мислења, претседателот одговорно и искрено ќе го разгледа барањето.“
- Претседателски помилувања во Израел речиси никогаш не се давале пред осуда, со еден битен исклучок на случајод 1986 година во кој беше вклучена безбедносната служба Шин Бет. Превентивно помилување на политичар во случај на корупција без признание на вина би било преседан и многу контроверзно.
- Пред неколку недели и Доналд Трамп му пиша на Херцог за да го замоли да го помилува Нетанјаху, кој е на судење од 2020 година по обвиненија за поткуп, измама и кршење на довербата, вклучувајќи политички услуги за богати поддржувачи во замена за подароци или позитивно медиумско известување.
