- Од Левица потсетуваат дека од МВР и од Оливер Спасовски нема коментар зошто станицата за технички преглед на компанијата „ВИА КОМЕРЦ Џемаљ“, во која бил регистриран автобусот на „Беса транс” и за која биле утврдени серија неправилности уште во август, добила решение за забрана на работата дури три дена по несреќата во ноември.
- Покрај тоа што нестручни лица извршувале прегледи на возила, компанијата не водела регистар на прегледани возила. Сепак, предлогот за забрана за работа на станицата министерот Оливер Спасовски не го потпишал, за на 5 октомври во станицата да пристигне автобусот, кој во ноември беше причина за ужасна трагедија.
- „Секојдневните одлуки на владиниот кадар и севкупната владина политика, се опасни по животите и здравјето на граѓаните и повикуваат на народна самоодбрана на физичкиот интегритет на секој поединец“, пишува во соопштението од Левица“.
- САД практично престанале навремено да ѝ доставуваат на Украина податоци за истрелани руски проектили, иако претседателот Зеленски изјави дека размената на разузнавачки податоци е обновена по краток прекин минатата недела.
- Енергетската инфраструктура во Киев синоќа била погодена со два брана балистички проектили, ракети и дронови. За првиот бран Украинците не добиле никакво предупредување. За вториот предупредувањето стигнало една минута пред да удрат проектилите.
- Украинската противвоздушна одбрана е немоќна без навремени информации од американски сателити, кои рано откриваат лансирање на руски ракети. На балистичките проектили им се потребни неколку минути од лансирањето до ударот во целта.
- Американскиот државен секретар Марко Рубио вчера изјави дека „софтверски проблем во системот за рано предупредување“ спречил Украина да добие информации за одредени лансирања на руски ракети.
- Француските власти воведоа полициски час во повеќе градови за да ги спречат немирите, откако за време на викендот беа вандализирани продавници и беа запалени владини згради.
- Во неколку населби во Париз се забранети демонстрации од 20 часот до 6 часот, а полицискиот час е на сила од 23 часот. Во Марсеј е воведена забрана за собири од пладне до 20 часот.
- Во саботата, кога протестите беа најнасилни, беа повредени над 1.000 полицајци и беа приведени повеќе од 2.300 луѓе. Министерот за внатрешни Лоран Нуњез призна дека полицијата „изгубила контрола“ врз немирите во неколку градови, иако на терен биле распоредени 60.000 полицајци и жандарми. Понудил оставка, но претседателот Макрон ја одбил.
- Премиерот Себастијан Лекорну не ја исклучи можноста за прогласување вонредна состојба или за активирање на членот 16 од францускиот Устав, кој на претседателот му доделува „вонредни овластувања“. Поранешниот премиер Габриел Атал, кој е претседателски кандидат на центарот за изборите следната година, побара да се ангажираат вооружените сили.
- Разузнавачките служби ја предупредиле владата оти левичарски политички групи би можеле да се обидат да ги попречат претседателските избори следната година. „Екстремно левичарско движење се обидува да ги вкорени нередите сè до претседателските избори“, изјави Лекорну.
