Вести › Набрзинка

Почина Цирко, единствениот човек на планетава кој можеше да го прераскаже „Андулизскиот пес“

5 May 2026

На 63 години почина Рамуш Муарем – Цирко, еден од најавтентичните ликови во македонскиот етер и јавен простор.
Му беа битни правата на Ромите, беше новинар, уредник, актер, шармантен, забавен и добар човек.
Сето тоа можеше да се види во неговата емисија „Циркотека“ која одеше на телевизијата БТР.
Флеш од минатото: Дента ќе се одржи (подоцна ќе сфатиме) легендарниот концерт на Ману Чао на Лизгалиште. Бината се спрема, ќе има прес конференција, Ману се шутка наоколу, дечките од БТР играат фудбалче на мали голови. Прифаќаат да го земат и него, да поигра. 15 минути подоцна станува јасно дека Ману дреме таму, овие не му додаваат.
- Зошто бе Цирко не му додавате на човекот?
- Затоа што е труп.

* Целата епизода на Уа шнајдери - тука

извор

302.000 потписи за референдум за отцепување на Алберта од Канада

5 May 2026

Сепаратистичка организација од Алберта објави дека собрала и доставила 302.000 потписи за барањето за распишување референдум за независност на оваа канадска покраина. Провинциската влада е обврзана да го почне процесот ако добие барање поддржано од 178.000 граѓани.
Гувернерката Даниел Смит најави дека ако потписите бидат верификувани, би можела да распише референдум веќе во октомври годинава.
Професорот по политички науки Даниел Беланд оценува дека референдумот веројатно нема да успее: „Во овој момент поддршката за независност во Алберта е помала од 30%“.
Дури и ако мнозинството гласачи на референдумот ја поддржи иницијативата, тоа автоматски нема да значи отцепување на Алберта, туку само ќе ги овласти провинциските власти да преговараат со федералната влада во Отава.
Источната франкофонска провинција Квебек два пати организираше референдуми за раздружување од Канада, во 1980 и во 1995 година. И двата пропаднаа.

извор

Проектот Слобода ги врати престрелките во Ормускиот проток

5 May 2026

Американскиот „хуманитарен“ Проект Слобода за деблокирање на бродовите заглавени покрај Ормускиот проток предизвика нови престрелки со Иран, први посериозни откако беше постигнато примирје на 8 април.
САД објавија дека два товарни брода безбедно поминале низ протокот, заштитувани од воената морнарица, која уништила шест ирански патролни чамци. Претседателот Доналд Трамп предупреди дека сите ирански сили што ги напаѓаат американските бродови ќе бидат „разнесени од лицето на Земјата“.

Техеран го демантира ова и тврди дека протокот останува блокиран. Иранската морнарица отворила оган врз американски воен брод и го принудила да се оддалечи од Ормускиот проток. Погоден бил и еден брод што се обидел да помине низ блокадата.

Иран во меѓувреме, истрелал ракети и дронови врз нафтениот центар Фуџиара во ОАЕ. Еден дрон ја пробил противвоздушната одбрана предизвикал пожар во пристаништето што Абу Даби го користи за пумпање сурова нафта. Ирански офицери го потврдија нападот како „одговор на авантуризмот на САД“.