- Во својот „Книжевен гоБлен“ на сајтот за култура Блен, Наташа Атанасова ги споделува своите впечатоци од македонското претставување на најголемиот издавачки и книжевен саем на светот - Франкфуртскиот.
- „Иако толку многу се подготвувавме за саемот, цело време се плашев дали ова што го правиме, дали целиот овој труд ќе биде залуден. Овој страв ми го подгреаја неколкумина што претходно работеле на нашиот штанд, кои ми кажуваа дека, општо земено, интересот е мал и речиси нема интерес за македонската уметничка литература. Меѓутоа, овогодишното искуство беше поинакво.“
- „Преводите на англиски на најдоброто од нашата книжевност од изминатите три години беа полн погодок, затоа што на сите што се заинтересираа за одреден автор или дело преку приказната спакувана во 1-2-3 минути, следното прашање им беше: има ли достапен превод на јазик што би можел да го разберам?
- „Ваквите претставувања се стратешка работа. Ова мора да биде дел од долгорочна стратегија за позиционирање на македонската книжевност на светската мапа и секое ново претставување да биде надградба на претходните искуства.
- Во нова колумна на Венко Андоновски објавена во Нова Македонија, тој се занимава со односот меѓу моќта - идеолошка категорија и телото - биолошка. Крајната цел на секоја тоталитарна идеологија е да го покори телото, затоа што телата се тие што маршираат во воен строј, водат војни, гласаат и можат да се управуваат.
- Тоа најдобро се гледа врз примерот на гениталиите, кои се епицентар на судирот меѓу билогијата и идеологијата, судир на телото со моќта. Но што кога паланката трпи недостиг од тела, односно материјал врз кјо би можела да ја тренира својата дисциплина? Што се случува кога другиот тип паланчани (откако поминале една ноќ во големиот град или во мотелот на половина пат) ќе отрикјат дека гениталиите можат да служат и за задоволства и уживање, а не само за репродукција?
- „И, додека овие две паланечки војски (отелотворени дури и во спротивставени партиски „програми“) водат војна околу функцијата на гениталиите, речиси никој не гледа дека и едните и другите со своите радикални ставови предизвикуваат ист ефект: масовно иселување на младите. Не гледаат дека гениталиите, кај гладниот и безработниот, немаат смисла ни како извор на уживање ни како „алат“ со кој се гарантира опстанокот на „родот“. Човек со празен стомак ниту помислува на деца и семејство ниту на „бесполезен“ оргазам. И така, си се сменуваат на власт „конзервативните гениталци“ и „авангардните гениталци“, а нашите деца секојдневно се иселуваат, без разлика дали сакаат со гениталиите да создадат семејство или да уживаат во нив.“
- Трубадур со назабена пила наместо лаута. Црн јавач на расипани точаци. Маалски бард. Циркуски кротител на подивени џубокси. Плеснете со рацете, гласно плескајте со рацете за 75-тиот роденден на единствениот ТОМ ВЕЈТС!
- Барајќи го срцето на саботната вечер, на 7 декември со почеток од 20 часот во Буква ќе го гледаме филмчето TOM WE ARE WAITSING (2009), ќе слушаме музика и ќе ги читаме неговите песни во препев на македонски. Гратис: ракија вејтсовача.
- Акустични инструменти и моментални инспирации за изведба на кавери се добредојдени.
