Нова книга тврди дека Вилијам Шекспир всушност бил „црна еврејска жена“, а не мажот со брадичка од Стратфорд каков што го знаеме денес. Според ова толкување, вистинскиот автор на драмите и сонетите била Емилија Басано, поетеса со врски на тудорскиот двор, која пишувала под псевдонимот „Шекспир“.
Авторката на книгата „Вистинскиот Шекспир“, феминистичката историчарка Ирена Кослет, смета дека со векови вистината за авторството била прикривана поради западноцентрична и евроцентрична идеологија. Таа тврди дека Басано имала мултикултурен идентитет – била Еврејка и Мавританка со потекло од Северна Африка – и дека токму тоа ѝ овозможило широчина на знаење и културни влијанија какви што се среќаваат во делата што му се припишуваат на Шекспир. Наспроти тоа, според книгата, дечкото од Стратфорд бил слабо образован и тешко е да се објасни како можел да создаде таков богат и разновиден книжевен опус.
Кослет тврди дека делото на Басано било присвоено затоа што општеството било поподготвено да слави „бел машки гениј“ отколку црна жена драматург. Таа наведува дека Басано била љубовница на Хенри Кери, влијателна фигура во театарскиот живот на времето, и дека можеби токму таа е инспирацијата за „Темната дама“ од Шекспировите сонети. Во книгата се сугерира и дека нејзиниот сопруг и самиот Шекспир од Стратфорд биле сатирично прикажани во текстовите, како и дека во драмите постојат скриени алузии на нејзиниот живот.
Иако портретите на Басано ја прикажуваат како светлокожа, авторката тврди дека тоа можело намерно да биде направено од уметниците, бидејќи светлата кожа во елизабетанска Англија се сметала за идеал на убавина. Според книгата, Шекспир од Стратфорд го искористил фактот што Басано била жена за полесно да го присвои нејзиниот труд, а сличноста меѓу неговото презиме и нејзиниот псевдоним наводно ја олеснила измамата, иако не постојат конкретни докази како точно се случило тоа.
Авторката заклучува дека случајот со Басано не е само пример за историски мизогинизам, туку и за историски расизам, бидејќи нејзиниот еврејски и африкански идентитет биле игнорирани или избришани од доминантната историја. Според ова гледиште, англиската книжевност има „мајка со мултикултурен идентитет“.
Сепак, преовладувачкиот став меѓу научниците останува дека Вилијам Шекспир е роден во Стратфорд во 1564 година, син на ракавичар, дека се школувал во локално училиште, работел во лондонските театри од почетокот на 1590-тите и починал во 1616 година – речиси три децении пред смртта на Емилија Басано.
