Во писмото објавено во најврвниот медицински журнал - Лансет, се вели дека општиот интерес за групен имунитет доаѓа од „општо распространетото деморализирање и се помалата доверба“ како резултат на повторното воведување рестрикции во голем број држави заради зголемениот број новозаразени.
Околу логиката дека треба да се заштитат само ранливите категории и да се дозволи вирусот да се шири само меѓу оние со помал ризик, тие порачуваат:
„Неконтролираното ширење кај младите значи ризик за значително ширење на болеста и стапката на смртност кај целата популација. Освен човековите жртви, ова ќе влијае и на целосната работна сила и ќе ја намали способноста на здравствените системи да обезбедат итна и рутинска нега“.
Меѓу потписниците има научници од сфери како јавно здравје, епидемиологија, медицина, педијатрија, социологија, вирологија, заразни болести, здравствени системи, психологија, психијатрија, здравствена политика и математички модели.
Дополнително, тие посочуваат дека до сега нема докази дека имунитетот против ковид-19 трае по прележување на болеста.
Наспроти групниот имунитет, нивен предлог е воведување масовни мерки за потиснување и контрола на пренесувањето на вирусот, поддржани со финансиски и социјални програми.
