Еден од најцитираните научници во светот, шпанскиот хемичар Рафаел Луке, е суспендиран без плата во следните 13 години, потврди и самиот Луке и институцијата каде што до неодамна работеше, Универзитетот во Кордоба во Шпанија.
Универзитетот го санкционирал Луке затоа што работел како истражувач и во други центри, како што се Универзитетот на Кралот Сауд во Ријад и Универзитетот за пријателство на народите во Москва, иако имал договор со полно работно време во Кордоба.
44 годишниот Луке е еден од најплодните научници во Шпанија. Има објавено околу 700 студии, главно од областа на таканаречената „зелена хемија“, чија цел е да синтетизира продукти како што се лекови и горива а притоа да се создава помалку отпад. Само оваа година, има објавено 58 студии.
Луке веќе пет години се наоѓа на листата на најцитирани истражувачи во светот, која ја составува специјализираната компанија Клариват. Институции ширум светот се натпреваруваат да ангажираат научници како него, за да ја подобрат својата позиција на меѓународните академски рангирања.
„Без мене, Универзитетот во Кордоба ќе падне за едно 300 места на шангајската листа. Си пукаа во колено“, рече Луке, кој неговата суспензија а припиша на „чиста завист“.
Пред повеќе од една деценија, водечките саудиски универзитети започнаа агресивни програми за регрутирање на најцитираните научници во светот. Универзитетот „Крал Абдулазиз“, на пример, на истражувачите им нуди околу 76.000 долари годишно, со единствена задача годишно да минуваат само една недела во нивниот кампус, и притоа да го додадат името на саудиската институција на деловната биографијата.
Луке тврди дека никогаш не примал пари како награда туку дека институциите со кои соработувал ги покривале единствено трошоците на неговите истражувања, како и патните и сместувачки издатоци.
п.с. Ние немаме никакви проблеми со паѓање на Шангајската листа бидејќи во првите 1.000 нема ниеден универзитет од Македонија.
***********
Види и:
