Едвард и Норма се во брак 55 години, од кои 33 во различни куќи. Прв пат се разделиле од економски причини - во 1981 со нивните три деца живееле во Боулинг Грин, Охајо, но Едвард кој бил без работа бил најмен од списанието Билборд, како уредник во редакцијата во Нешвил. Тој се преселил, а по десет години постепено во истиот град се преселило целото семејство. Но Норма продолжила да живее сама, а маж ѝ ич не се бунел.
Неговото објаснување е следно - во текот на тие 10 години одделен живот обајцата откриле дека многу им годи да си ги контролираат распоредите, финансиите и круговите пријатели. Во времето кога биле заедно токму овие теми биле каменот на сопнување помеѓу нив - живеејќи под ист покрив тие сепак морале да ги трпат каприците и вкусовите на другиот. Едвард вегетаријанец, Норма не. Тој ноќна птица, таа си легнува со кокошките. Таа сака кучиња, тој само не ги јаде. Таа сака да патува, тој никогаш не летал со авион.
И не дека живеењето одделно не било искушение да се проба нешто и со некој друг. Но тие врски обично траеле кратко, а фактот што и двајцата отворено зборувале за тоа спречило несакани сцени. Секогаш кога некој од нив имал здравствен или друг проблем, географски одделениот „значаен друг" (како што гласи полу-шеговитиот, демек политички коректен израз за партнер) секогаш бил тука да помогне.
И после сето ова, како ваквата врска се разликува од пријателство? Така што и двајцата не престанале да се сакаат, како маж и жена. Плус трите деца, од кои сега имаат шест внуци и еден правнук. Едноставно се работи за 55 години споделени спомени, сè што обично се доживува во бракот, но минус мрчењата, напнувањата, тензиите и љубоморите. Вака ако ги поставиш работите, не звучи ич лошо.
