Силициумската долина се претвори во она што требаше да го замени

Некогаш малите стартапи кои требаа да го уништат моделот на гигантите како што беше ИБМ со нивните мејнфрејм компјутери, во меѓувреме се претворија во токму такви гломазни компании. И мејнфрејм концептот го вратија, со ново име - клауд.

Во долината која е центар на технолошката моќ некогаш важеше правилото „мало е убаво“ а таа беше синоним за нови, агилни и спретни компании кои се мали но имаат визија и менаџираат моќни идеи и иновации кои можат да станат „следната голема работа.“ Децентрализираноста и флуидноста беа главните особини на Силициумската долина по која таа се разликуваше од претходните технолошки хабови во историјата.

Но, по заздравувањето од дотком поразот, успешните компании стануваат сè поприсутни и сè помоќни и тие почнуваат да го менуваат наративот дека малото е убаво. Бидејќи гигантите како Фејсбук, Гугл, Епл и Амазон по многу параметри веќе нагазуваат во анти-монополските сиви зони, тие својата големина ја правдаат со тоа што конкуренцијата е глобална, во неа главни конкуренти им се Кинезите а тие се големи.

„Тоа е обично лицемерие. Кога Гугл и Фејсбук беа стартапи, нивните главни луѓе тврдеа дека стартапите се добри. Сега кога се големи, нивните извршни луѓе тврдат дека огромните компании се добри. Цинично е тоа, иако не е неочекувано,“ пишува Алексис Мадригал во Атлантик.

Во меѓувреме гигантите го променија и својот концепт за истражување и развој. Наместо да излегуваат со нови продукти, тие се дадени на усовршување на процесите.

Во Силициумската долина веќе не може да се остане мал и успешен бидејќи таквиот поизвесно е дека ќе го проголтаат (купат) гигантите, така што мрежата веќе не е мрежа туку е октопод. Во Силициумската долина секогаш најдобро било да си основач. А најдобро што може да го направи основачот отсекогаш било да најде начин да ги замени оние кои таму биле пред него. Тоа денес веќе не е можно бидејќи големите се преголеми и го имаат капиталот со најголема специфична тежина: планини податоци за корисниците.

23 јануари 2020 - 12:43