Комисијата исплаќаше оперативни грантови за покривање на секојдневните трошоци на здравствените невладини организации, вклучувајќи плати и режиски трошоци, во рамките на програмата EU4Health, сè до запирањето на исплатите претходно оваа година. Во 2024 година, програмата издвои 9,3 милиони евра за оперативни грантови за невладини организации.
Укинувањето на системот за оперативни грантови принуди некои непрофитни организации да го намалат персоналот или целосно да го напуштат Брисел.
Невладини организации оценија дека оваа одлука на Европската комисија е нелегална и поднесоа жалба до европскиот омбудсман.
На Европскиот здравствен форум во Гштајн на 2 октомври еврокомесарот за здравство Оливер Вархеји им објаснил на невладините дека е нелегално Европската комисија да ги финансира нивните основни активности и дека средствата се доделуваат за специфични проекти.
На барањето да ги појасни забелешките на Вархеји, портпаролот на Европската комисија потврдил дека „извршната власт нема законска обврска според Финансиската регулатива или регулативата EU4Health да исплаќа оперативни грантови на невладините организации“.
Според новиот работен план на EU4Health, невладините организации може да аплицираат за европско финансирање за специфични проекти. Комисијата сега ги предупредува организациите дека не смеат да ги користат грантовите за други намени освен за тие што се дефинирани во договорот.
Откако администрацијата на Доналд Трамп го запре финансирањето на многу невладини организации поради расипничко трошење на парите, и во Европа се зголеми притисокот врз невладините за намалување на грантовите и за укинување за оние што ги злоупотребуваат.
