Шефот на Пентагон Пит Хегсет пред една недела ги информирал колегите од НАТО дека САД планираат значително да ги намалат своите актуелни обврски кон таканаречениот „Модел на сили“, усвоен во 2022 година по руската воена инвазија врз Украина. Овој модел предвидува кои единици и воени капацитети од земјите-членки му се на располагање на врховниот командант на сојузничките сили за Европа (SACEUR) за да обезбеди одвраќање и одбрана на Европа од евентуален руски напад.
Според постојниот систем за распределба, САД обезбедија приближно половина од воените капацитети на НАТО. Сега, бараат прераспоредување на товарот. Александер Велез-Грин, советник на Хегсет, минатиот петок им презентирал на политичките директори на НАТО конкретни бројки за намалување на американските сили.
Намалувањата биле подрастични отколку што очекувале партнерите.
Европските дипломати пред состанокот претпоставуваа дека дискусиите ќе вклучуваат мали прилагодувања со текот на времето. Сепак, САД имаат намера да придонесат значително помалку стратешки бомбардери во НАТО, а се дискутира и за намалување на придонесот на американските борбени авиони за една третина, тврдат извори на Шпигел.
Европејците ќе мора да обезбедат и повеќе сопствени извидувачки и вооружени беспилотни летала. Уште поголеми кратења се предвидени за морнарицата. Европа ќе треба да ги замени двата носачи на авиони што САД претходно ги регистрираа за распоредување според Моделот на сили на НАТО. Американците ќе повлечат и неколку разурнувачи и повеќе нема да придонесуваат со нуклеарни подморници.
Придонесот на САД во секоја категорија - во апсолутни бројки или во однос на неговите европски партнери – не е познат. Според европски претставници, клучното прашање е на која временска рамка Американците ги темелат своите планови.
Европските земји-членки на НАТО немаат стратешки бомбардери способни да носат нуклеарно оружје. Еден начин да се компензира недостатокот на борбени авиони би бил преку тековните испораки на авиони Ф-35 до европските сојузници. Германските вооружени сили треба да го примат првиот авион од САД следната година. Полска штотуку ги доби своите први три Ф-35.
Намалувањето на американските капацитети е реално и одговорно, бидејќи многу Европејци инвестираат повеќе во одбраната и се способни да придонесат повеќе, објаснил советникот на Хегсет.
Планираното намалување не значи, според воените извори на Шпигел, дека САД нема да интервенираат доколку се појави вонредна состојба во националната одбрана во Европа. Вашингтон првенствено бара поголема флексибилност - не сака да биде обврзан со регистрирање на воени капацитети во НАТО ако избувне конфликт во Индо-Пацификот.
Моделот на сили на НАТО вклучува и единици стационирани во САД кои би биле распоредени само во услови на криза, врз основа на нивната оперативна подготвеност. Дефинирани се трупи до кои Врховниот командант на сојузничките сили може да пристапи најдоцна во рок од десет дена, оние кои мора да бидат достапни во рок од 10 до 30 дена и други кои мора да бидат подготвени во рок од 30 до 180 дена.
