Во разговор за БиБиСи, Филипо Гранди објаснува дека државите мора да им помогнат на "неколкуте земји" што го носат целиот товар, со тоа што ќе го зголемат финансирањето и ќе помогнат во вдомување на бегалците. Минатата година помалку од 1% од 20-те милиони бегалци биле вдомени од друга нација.
Гранди, кој доаѓа на позицијата во јануари годинава, објаснува дека фактот што денес има сириски бегалци во Источна Азија и на Карибите, покажува "колку е ова станато глобален феномен, заради што и е потребен глобален одговор."
"Проблемите за згрижување на бегалците паднаа на грбот на неколку држави кои згрижија стотици илјади бегалци, обично близу војните, близу конфликтите, и неколку донатори кои сами, околу седум или осум, покриваат 80 - 90 проценти од финансирањето," објаснува Гранди.
Негова препорака е дека преселувањето на овие бегалци во други држави "е правецот во кој мора похрабро да се оди," имајќи предвид дека само 200.000 од 20-те милиони бегалци, се преземени од друга држава. Тој признава дека решението ќе бара "многу долга и тешка дискусија," ама:
"Едноставно не може да се дозволи да имаме реакција во која државите ќе ги затвораат своите граници и ќе ги одбиваат луѓето, затоа што тоа нема да успее."
