Се работи за генерал Олександр Сирски, чиј главен грев е што инсистира и успева на северот на земјата да повлече значителен број украински војници како би се одбранил од руските напади на Купјанск, а со тоа и на стотина километри оддалечениот Харков.
Откако Украинците имаа повеќе од два месеца да направат позначителен напредок и пробивање на југот од земјата, периодов се повеќе американски медиуми објавуваат анонимни или протечени информации од врвот на Белата куќа и Пентагон, дека неуспехот на контраофанзивата во добар дел се должи на тоа што Киев не ги следи советите и стратегиите разработени од западните сојузници. „Болката“ на Пентагон е зошто Украинците со сите свои сили не удрат на една точка на југот и да ја пробијат руската одбрана, туку се растегнати по цела должина на фронтот и непотребно се концентрирани на север.
Ставот на Украинците е дека тие можат да го издржат ваквиот тип на војување и треба трпение од сите, и дека предложеното повлекување од Купјанск е токму она што го сакаат Русите. Зеленски пред некој ден јавно порача дека немаат намера да се повлечат ниту од Харков, ниту од Донбас и дека „ниту еден аналитичар во светот не треба да помислува на такво нешто.“
Генерал Сирски изјави дека Русите веќе се прегрупираат на северот и почнале да носат нови сили од Русија, за таму да можат да напредуваат. Тајмс забележува дека „тврдењата на Сирски за пристигнување на нови руски единици не може независно да бидат потврдени.“
Украинците го освоија Купјанск минатиот септември и негова загуба би била сериозен удар за Киев. Меѓутоа дел од аналитичарите проценуваат дека Русите немаат намера да го освојуваат градот бидејќи тоа ќе им ја искомпликува позицијата во која се наоѓаат, туку е поверојатно да стигнат до реката Оскил, која го дели градот на два дела, и да ја искористат како природна бариера.
