Пред војната во февруари 2022 Украина има 56 гигавати инсталиран капацитет и околу 36 гигавати реален капацитет. Разликата меѓу бројките е затоа што не секогаш сите електрани / реактори / блокови се активни, што заради штедење, што заради старост и истрошеност. Пример, двете електрани Углегорска и Запорижиа имаат номинален капацитет од 0,8 гигавати, меѓутоа затоа што е непрофитабилно да се снабдуваат со гас во толку големи количества тие со години се затворени.
Се на се половина од инсталираниот капацитет во Украина доаѓа од термоелектрани, а остатокот е поделен меѓу нуклеарни електрани, хидроелектрани и обновливи извори.
Официјалните бројки се дека од почетокот на војната до сега Украина останува без половина од своите капацитети за генерирање енергија, кои или се оштетени или се уништени или под руска окупација.
„Реалноста веројатно е полоша, бидејќи се проценува дека е останата една-петина од вкупниот инсталиран капацитет,“ пишува Киев пост.
Процените дека Украина моментално има 20 гигавати активен капацитет се оспоруваат по основа дека тој капацитет не секогаш е достапен во мрежата, пример не се земаат предвид поправите на нуклеарките и достапноста на водените ресурси.
Според извештај од О.Н. до март 2023, активниот капацитет на Украина паѓа на 14 гигавати, а Киев пост смета дека од тогаш земјата успеала да врати неколку гигавати пред почетокот на минатата зима.
Зеленски на конференција во Берлин изјави дека пикот зимска потрошувачка на Украина е 18 гигавати.
„Имајќи ги предвид сегашните рестрикции, и ако двете бројки се сметаат за точни, тоа ќе значи дека Украина најверојатно во моментот не може да генерира 10 гигавати струја и покрај пикот на дневен увоз од 1,7 гигавати од Европа,“ пишува Киев пост.
Освен електраните, на мета на Русите беше и мрежата за пренос на енергија, која е распарчена, а ситуацијата ја влошува и тоа што голем број нуклеарни реактори се изгазени заради рутинско одржување.
„Доколку дојде до најлошото, претстојната зима може да нема доволно струја за функционирање на јавното греење и водоводната мрежа,“ смета Киев пост.
Се проценува дека Русија во војната има окупирано електрани со номинален капацитет од речиси 14 гигавати, а оштетено или уништено околу 9 гигавати.
Освен поправање на уништеното, едно од решенијата што го имаат преземено повеќе компании е изградба на сопствени мини-електрани од 2-3 мегавати, или комбинирани електрани струја и греење за кои плаќаат отприлика по 1 милион долари од мегават и се градат за три до девет месеци.
Дополнително олеснување се гледа во опцијата да се повлече уште струја од Европа која од сегашните 1,7 гигавати во пикот би можела да порасне на 2,2 гигавати, колку што е отприлика максималниот капацитет на мрежата за увоз на струја.
Крајната математика на Украинците е дека во просек би чинело околу 1 милијарда долари за да се обнови 1 гигават енергија, без разлика од кој извор е.
