Според новите предлози за зајакнување на кибернетска безбедност, ЕУ планира постепено да ги отстрани компонентите и опремата од добавувачите со „висок ризик“ во критичните сектори.
Како оправдание за мерките, утврдени од Европската комисија во ревизиите на Законот за кибернетска безбедност на ЕУ, се наведуваат засилените хакерски напади со барање откуп и загриженост за странско мешање и шпионажа од странски добавувачи.
Кинеската стопанска комора до ЕУ (CCCEU) забележува дека Унијата би можела да се соочи со загуба од 367,8 милијарди евра во следните пет години доколку Брисел ги исклучи кинеските добавувачи според предложената ревизија. Предлогот воедно може да ја загрози дигиталната конкурентност и економската безбедност на ЕУ.
Кумулативните економски загуби за членките на ЕУ би биле еквивалентни на речиси две цели години од годишниот буџет на Унијата, се наведува во нов извештај на комората.
Годишните загуби ќе се зголемат од 39,1 милијарди евра во 2026 година и ќе достигнат врв од 93 милијарди евра во 2028 година, пред да се спуштат на 89,6 милијарди евра за 2030 година, според студијата.
Германија би го имала најтешкиот товар, со проценета загуба од 170,8 милијарди евра, по што следат Франција со 46,3 милијарди евра и Италија со 36,5 милијарди евра.
Освен директните трошоци за хардвер, проценети се и 102,1 милијарди евра социјални загуби, од кои 88,3 милијарди евра се поради одложената дигитализација и трошоците за зелена транзиција. Од сите 18 сектори, логистиката и производството би биле најтешко погодени со 114,6 милијарди евра, по што следат енергетиката со 79,9 милијарди евра и телекомуникациите со 57,4 милијарди евра.
Критериумите за идентификување на таканаречените добавувачи со висок ризик се чини дека се политички насочени. Овој пристап го политизира донесувањето комерцијални одлуки и е спротивен на сопствените принципи на ЕУ за еднаквост и недискриминација, предупредува Лиу Џиандонг, претседател на CCCEU.
Тој додава дека до денес нема поткрепени докази за техничка злоупотреба или кршење на правилата на ЕУ за кибернетска безбедност од кинеските компании што работат во Унијата.
Предложените мерки, од друга страна, може да ги прекршат билатералните инвестициски договори меѓу Кина и повеќето земји-членки на ЕУ, што потенцијално ќе предизвика барања за надомест и повеќестепени судски спорови. Би биле прекршени и основните правила на Светската трговска организација, ризикувајќи понатамошни меѓународни трговски тензии.
Замената на кинеските добавувачи веројатно нема да постигне значајни безбедносни придобивки. Наместо тоа, ќе има системски негативни ефекти: преоптоварување на буџетите за иновации, фискални оптоварувања врз земјите-членки и еродирање на приходите на европските домаќинства, се предупредува во извештајот.
