Научници од Универзитетскиот колеџ во Лондон анализирале податоци од сателити за периодот 2002-24 година, кои ги следат промените во гравитационото поле на Земјата. Бидејќи водата е тешка, промените во подземните води, реките, езерата, влажноста на почвата и глечерите се појавуваат во сигналот, дозволувајќи им на сателитите ефикасно да „измерат“ колку вода е складирана.
Наодите откриваат остра нерамнотежа: северот и северозападот од Европа - особено Скандинавија, делови од Велика Британија и Португалија - стануваат повлажни, додека големи делови од југот и југоистокот, вклучувајќи делови од Велика Британија, Шпанија, Италија, Франција, Швајцарија, Германија, Романија и Украина, се исушуваат.
Податоците за складирањето на водата се во корелација со податоците за климатските промени. Професорот Мохаммед Шамсудуха вели дека „веќе не зборуваме за ограничување на затоплувањето од 1,5 проценти бидејќи веројатно веќе се движиме кон 2%.“
Иако вкупните врнежи од дожд може да бидат стабилни, или дури и малку зголемени, моделот се менува. Сведоци сме на пообилни поројни дождови и подолги сушни периоди, особено во лето. Подземните води се сметаат за поотпорни на климатските промени од површинските води, но обилните летни поројни дождови често значат дека повеќе вода се губи поради истекување и ненадејни поплави, додека зимската сезона на полнење на подземните води може да се скратува.
Хана Клок, професорка по хидрологија на Универзитетот во Рединг, вели дека ако следната пролет и лето Англија не ги добие потребните врнежи од дожд, ќе има сериозни последици и ќе треба да се соочи со сериозни ограничувања на водата што ќе го отежни животот на сите.
*********
Види и:
