Натпреварот Словенија - Македонија во салата „Бонифика“ во Копар започна со минута молк, а на македонските ракометари нималку не им беше до игра денес, по незамисливата трагедија во дискотеката во Кочани.
Што се однесува до самиот натпревар, првите погодоци на мечот ги постигнаа Јовичиќ и Филип Кузмановски. Словенските ракометари потоа направија серија од 3-0 и брзо поведоа со 4-1. Кузмановски и Пешевски резултатски ја одржуваа македонската селекција во натпреварот кој навистина никому од нашата делегација и навивачи не значеше ништо во моментите на огромна тага во татковината.
По 12. минути игра Словенија поведе со 9-4, а до паузата ја зголеми предноста на огромни и недостижни 20-12. Уште тогаш беше јасно прашањето на победникот.
Голем проблем за нашата репрезентација беше и тешката повреда на Марко Митев во 19' минута од мечот кога беше изнесен од паркетот.
На крајот конечни 38-27 за Словенија. Најефикасни во македонската репрезентација беа Филип Кузмановски со шест погодоци а по три гола дадоа Костески, Пешевски, Лазаревски, Серафимов и Павле Атанасијевиќ.
Кај Словенците Алекс Влах со 9 гола беше најефикасен играч на мечот а кај голманите Словенецот Базник одбрани осум удари, Лескај Три а кај црвено-жолтите Никола Митревски запиша шест интервенции а резервниот голман Галевски имаше четири фатени топки.
Со оглед на победата на Литванија против Естонија, Македонија сега е на трето место на табелата во групата 1 со само два бода, четири помалку од Литванците и шест од Словенците кои веќе се пласираа на Европското првенство.
Македонија прилика за место на Еуро2026 ќе ја бараме во последните две кола во кои мораме да ги победи Литванија и Естонија, но треба и Словенците да ни направат услуга.
Македонските ракометари и навивачи најтешко во живот ја испеаа химната
