Откако во основното време беше 0:0 и немаше голови, „Келтите“ победија 4-2 на пенали. Бојан Миовски остана на клупата за резерви и не влезе во игра иако домашниот тренер направи дури шест измени во текот на натпреварот и продолженијата.
Ова беше 451. „Олд Фирм“ дерби во четвртфиналето на шкотскиот Куп. Во шкотското првенство и двете екипи заостануваат необично зад најголемото изненадување Хартс кој е лидер во борба за титулата.
Селтик кој е предводен од ветеранот Мартин О'Нил немаше изгледни шанси на „Ајброкс“ а домаќинот Ренџерс кој е во подобра форма имаше дури 24 шута но ниту еден не ја затресе мрежата на гостите.
Во пенал серијата трагичари кај Ренџерс беа капитенот Џејмс Таверније и Џеиди Гасама, а кај Селтик погодија сите четворица изведувачи: Окслејд-Чембрлен, Трасти, Хатате и Чванчара.
Токму Чванчара после постигнатиот гол прослави пред трибината со навивачи на Ренџерс, а на другата страна оние на Селтик, околу 7.500 на број влетаа на терен да слават со своите фудбалери па изби хаос кој полицијата и редарите го решаваа.
Во целиот хаос фудбалер на Селтик Хулиан Араухо и член на стручниот штаб на гостите биле нападнати од навивачи на Ренџерс кој влетале во теренот. Шкотската фудбалска асоцијација отворила истрага за овој настан и ќе следуваат казни.
