- Некогашниот селектор на Кина Ли Тие (47) е најпознато име од 20-ина лица осудени за проневери, мито и корупција во спортот.
- Ли Тие кој на времето играше и за англиски Евертон во Премиер лига, е осуден на 20 години затвор во Кина затоа што по сопствено признание од јануари 2020-та до декември 2021-ва земал мито за да дели репрезентативни повици. Во петокот бил осуден во судот во провинцијата Хубеи.
- Според истрагата тој земал повеќе од 16,5 милиони долари мито за места во репрезентациајта. Наводно дал и 421.000 долари за да стане селектор и учествувал во местење натпревари во кинеската Супер Лига.
- Поранешниот голман на Слобода Ужице, белградски Партизан и други српски и грчки клубови Радиша Илиќ (47) извршил самоубиство откако скокнал од тераса во својот дом. Тој подолго време тешко боледувал, пренесуваат српските медиуми.
- Навивачите на Партизан ќе го паметат како јунак кој ги внесе во Лига на шампиони во август 2010-та година кога директно и индиректно влијаеше на три промашени пенали на белгиски Андерлехт во Брисел во баражот за пласман во Лига на шампиони.
- Со белградските црно-бели Илиќ освои дури пет шампионски титули и два национални Купа а забележа и еден настап за Србија, на пријателска средба со Македонија во 2008-ма.
- Македонската ракометна репрезентација одигра два различни дела од дуелот со Словенија во квалификациите за Европско првенство 2026. На крајот Словенците победија убедливо со шест гола разлика.
- Селекторот Кире Лазаров после мечот повторно зборуваше за овдешниот менталитет. Кажа дека не е разочаран од поразот но дека му смета што „Македонец по забележителен успех е тешко да го држиш свесен и трезвен и дека ова е добра лекција за нашиот менталитет“. „Ние само се повторуваме, не знаеме како Македонци да бидеме константни во повремените успеси. Треба да се работи на менталниот склоп“.
- Македонија е трета во групата зад Словенија и Литванија а до крајот од квалификациите ја очекуваат дуели со Словенија, Литванија и Естонија. Одлуката за пласманот на Европското првенство ќе падне во мај кога Македонија ѝ гостува на Естонија и ја дочекува Литванија во клучен меч.
