Барселона ја објави информацијата за новиот тренер, на пресот по повод заминувањето на Гвардиола.
„Го избравме Тито бидејќи ја претставува идејата и имиџот на клубот. Тој ја има посветеноста и тој е личноста за клубот," порача спортскиот директор на Барса, Андони Зубизарета.
Пеп Гвардиола пристигна во Барселона во 2008-та година. Четири години му беа повеќе од доволни за да се вброи во тренерските легенди на каталонскиот гигант. 13 трофеи подоцна, Гвардиола реши да ја спушти завесата на неговата ера во Барселона.
По четири успешни сезони во кои тој освои се што можеше да се освои на фудбалските терени, Гвардиола одлучи да ја напушти Барселона.
Тој својата одлука му ја кажал на претседателот Сандро Росел на четиричасовниот состанок во средата, а утрово тоа им го пренел и на фудбалерите.
Како причина за неговото заминување тој го навел заморот и желбата за пауза од тренерската работа, но веќе започнаа гласините за неговиот нов ангажман, а најгласни се оние кои велат дека тој е на врвот на листата со желби на Ромаб Абрамович.
Неискусниот Гвардиола седна на жешката клупа на Барселона по само една година помината со вториот тим, но тој имаше нешто што неговите претходници го немаа, а тоа беше долгиот стаж во каталонскиот дрес.
Гвардиола е роден во Каталонија, на 70 километри од Барселона. Со 13 години тој стана дел од позната академија Ла Масиа чиј член беше шест години пред да дебитира за Барселона. Дресот на Барселона го носеше на 263 натпревари во текот на 11 сезони, за тоа време освои шест титули во шпанската Примера.
Каталонскиот гигант го презеде во 2008-та година и за овие четири години тој успеа да ја оформи играта на според многумина најдобриот фудбалски тим на сите времиња. А бројките се потврда за тоа.
Титули на клупата на Барселона:
Примера (3): 2008–09, 2009–10, 2010–11
Шпански Куп (1): 2008–09
Шпански Суперкуп (3): 2009, 2010, 2011
Лига на шампиони (2): 2008–09, 2010–11
Суперкуп на Европа (2): 2009, 2011
Светско клупско првенство (2): 2009, 2011
