Финалето на Лигата на шампиони ќе се одигра на 19 мај на Алијанц арената во Минхен, домашниот стадион на Баерн и тоа сигурно ќе биде од огромна помош за Баварците, но поддршката од трибините ќе биде подеднаква и за нив и за Челси.
Капацитетот на Алијанц арената изнесува 69.000 гледачи, но на европските натпревари капацитетот е намален на 66.000 гледачи.
Според прописите на УЕФА, за финалето од Лигата на шампиони на двата финалисти им следуваат по 17.500 влезници, дел од останатите билети ќе им бидат поделени на спонзорите, а дел се пуштени во продажба.
За секое финале на најелитното клупско натпреварување во изминатите години имало огромен интерес за влезници, но овој пат тој интерес е уште поголем затоа што Баерн игра во својот град. Според информациите од Германија, откако Баерн Минхен синоќа успеа преку Реал Мадрид да се пласира во финалето, само во текот на ноќта клубот примил над еден милион барања за влезници.
Ова ќе биде четврти пат во историјата како еден од финалистите од Лигата на шампиони игра на домашен терен.
Во 1957-та година, Реал Мадрид ја Сантјаго Бернабеу ја победи Фиорентина со 2:0, во 1965-та Интер триумфираше на својот Сан Сиро против Бенфика со 1:0, а во 1984-та година домашниот терен не им донесе среќа на Рома која по пенали загуби од Ливерпул.
