Вака така Мурињо може да му донесе три трофеи на Јунајтед

Жозе Мурињо е еден од оние тренери кои или го сакаш или го мразиш. Како стојат работиве навивачите на Манчестер Јунајтед има ептен да го засакаат, само ќе треба уште да почекаат што ќе се случи на 24 мај.

Во период кога Манчестер Јунајтед веќе четврта сезона е без Сер Алекс Фергусон и е во потрага по играчи и тренер со кои ќе се врати на старите патеки, оваа сезона за нив може да биде пресвртница.

Што направија наследниците на Ферги, Дејвид Мојс и Луј Ван Гал, а што прави актуелниот нивни предводник Жозе Мурињо?

За Дејвид Мојс знаете добро. Тој е едно годишна завршена и избришана приказна на кој веќе и никој не се навраќа. Го водеше Јунајтед само една сезона во која имаше 12 порази и заврши на седмо место со кое беше во аут од Европа.

Следната сезона дојде Ван Гал и сработи многу подобро од неговиот претходник. Го освои 4-место и преку квалификациите влезе во групната фаза од ЛШ. Но таму мина многу лошо бидејќи не успеа да влезе во нокаут фаза во група со Волфсбург, ПСВ и ЦСКА Москва, а потоа имаше неуспешна авантура и во ЛЕ каде ги продолжи настапите како третопласиран.

Прво го мина Митјиланд, но во осминафинале беше елиминиран од големиот ривал Ливерпул. Ако ништо друго Ван Гал барем им донесе еден трофеј, тоа е ценетиот ФА Куп.

За разлика од нив двајца Мурињо може да испадне многу поголем фраер. Тој повлече искусен потег и ги ослободи играчите од притисок во Премиер лигата за која рече дека сезоната им е завршена, бидејќи за 4-то место кое носи квалификации во ЛШ се бори и Арсенал, а најблиску е Сити.

Тој веќе им донесе еден трофеј, а тоа е оној во Лига Купот, а сега е во игра за уште два. Синоќа се отараси од Селта која ја мина тесно со вкупни 2:1 и му обезбеди финале на Манчестер Јунајтед во ЛЕ.

Црвените ѓаволи имаат три трофеи во ЛШ (1967/1968, 1998/1999 и 2007/2008), но никогаш ја немаат освоено Лигата на Европа. Таа не носи само трофеј, туку уште две големи работи.

Прво пласман во уште едно финале, а тоа е токму она во Скопје на 8 август во Супер Купот на Европа каде би играл со победникот од мечот Јувентус - Реал Мадрид. И второ директен пласман во Лигата на шампионите каде што му е местото на клуб од калибарот на Манчестер Јунајтед.

Што од ова ќе му се оствари на искусниот Мурињо ќе видиме на 24 мај во Стокхолм.

Не за џабе вака се радуваше магарето вчера, знае тој што прави ај вие :).