Шест слободни места во ЛЕ

Откако ги дознавме најдобрите 16 екипи кои ќе продолжат со осминафиналните битки од Лигата на шампионите, вечерва ќе ја имаме конечната разврска и во второто по ранг клупско европско натпреварување.

По првите пет кола вкупно 18 екипи изборија пласман во следната фаза од Лигата на Европа, а за да се формираат 12-те двојки кои ќе ги дознаеме на ждрепката која е закажана за в понеделник, вечерва уште шест екипи ќе треба да обезбедат пласман во нокаут фазата.

Во А групата во многу поповолна ситуација е тимот на Свонси на кој му е потребен само бод во Швајцарија без разлика на резултатот на Кубан кој има тешко гостување на „Местаља" каде ќе мора да оди на победа.

Екипите на ПСВ и Черноморец ќе одлучуваат во директен дуел за втората позиција во групата Б, а на Холанѓаните им е потребен само бод за пласман во следната фаза.

Во групата Д најголеми шанси за понатамошен пласман имаат фудбалерите на Зулте Варегем кои го пречекуваат веќе пласираниот Рубин Казан кој е закован на челната позиција.

Во Ф групата најблиску до пласман е тимот на Макаби на кој му треба само бод на дуелот со веќе отпишаниот Бордо, исто како и на тимот на Динамо Киев кој ќе решава пред своја публика против Рапид Виена.

Во групата Х Либерец и Фрајбург имаат ист број на бодови. Германците ги очекува дуел против Севиља, а Чесите имаат полесен противник затоа што играат на гости против Есторил кој е без шанси.