Паралелно со победничката низа и налетот на Македонија кон плејофот за ЕП 2020, уште една мала фудбалска нација од Лигата Д е во транс. Се работи за Луксембург, земјата со 600.000 жители која ги живее најубавите фудбалски моменти во својата историја.
Луксембург синоќа го совлада Сан Марино и изби на првата позиција во втората група. Сега има 9 бода исто колку Грузија во првата и Македонија во четвртата група и се наметнува за лидерската позиција за која ќе се бори и Белорусија.
Додека ние може да се пофалиме со серија од 10 меча без пораз, Луксембург бележи резултати за кои не ни сонувале. На последните 15 средби имаат скор од 8 победи, 3 нерешени и 4 порази.
Тоа е фантастична низа и невиден прогрес за нив, ако се знае дека претходно на 15 меча имале дури 13 порази. Од 2017-та година ги победија Белорусија, Унгарија, Албанија, Грузија и Малта, а ремизираа со Бугарија и Сенегал. Сите овие селекции се над нив на рангот на ФИФА.
Она што мора да се издвои е и сензационалниот нерешен резултат против Франција и тоа на мундијалските квалификации, токму против селекцијата која потоа стана Светски првак. Затоа полека со тоа аматери, пацери или село без кучиња.
Оваа репрезентација вреди 40 пати помалку од Мбапе и има освоено 24 бода од можни 396 во квалификации за СП за 87 години, ама тоа не значи дека треба да се откаже од фудбал.
Да потсетиме дека со Луксембург и ние имаме тазе непријатени спомени. Во квалификациите за ЕП 2016 не совладаа 1:0, а на реваншот дома едвај ги победивме со гол во 92-ра минута за конечни 3:2.
Ова се резултатите на нивните 15 последни средби.
