Кристал Палас ја започна и синоќа ја продолжи незапамтената криза на Ливерпул. На 27-ми септември сезонава тимот од Лондон со 2-1 го совлада првакот со гол на Нкетија во последните секунди од мечот во 90+7' минута од судиско продолжение.
После тоа Ливерпул изгуби од: Галатасарај (1-0) во Лига на шампиони, од Челси (2-1) во Премиер лига, од Манчестер Јунајтед (1-2) во Премиер лига, па го победи Ајнтрахт Франкфурт (1-5) на гости, па изгуби од Брентфорд (3-2) во Премиер лига и сега во Лига Куп од Кристал Палас (0-3) дома.
АРНЕ СЛОТ ЕКСПЕРИМЕНТИРАШЕ, ПРОБА СО МЛАД СОСТАВ АМА НИ ТОА НЕ МУ УСПЕА
Ливерпул синоќа излезе на терен со 17-годишниот Рио Нгумоа, со 18-годишниот Трем Ниони и со 18-годишниот Киран Морисон. Во напад играше резервистот Федерико Кјеза а ѕвездите не беа ниту на клупа.
Имаа црвените мала предност во посед на топка, имаа неколку шанси но пред крајот на првиот дел се им се распадна: во само четири минути примија два гола и приказната заврши.
Во 41' минута Даити Камада му асистираше на Исмаила Сар, а потоа Сенегалецот му додаде на Јереми Пино за 0-2.
Ова беше седми гол на 9 натпревари на Исмаила Сар против Ливерпул. Во 2020-та Сенегелаецот му го нанесе првиот пораз на Ливерпул под Јирген Клоп, а во август му помогна на Кристал Палас да му го земе Суперкупот на Англија на Ливерпул пред нос.
Арне Слот немаше што да понуди од клупа - таму исто беа млади играчи. Нововлезениот Амар Нало доби црвен картон а Пино во 88-ма минута стави крај на сите надежи - 0:3 на Енфилд Роуд.
ЗАНИМЛИВОСТИ:
- Ливерпул на два натпревари по ред прима по два гола во прв дел. Претходно од април месец немаше такво нешто а сега веќе два во само неколку дена.
- Кристал Палас забележа 3-та победа против Ливерпул сезонава. Прво во август им го земаа Суперкупот, после ја продолжија победничката серија во Премиер лига (1-2) и синоќа пак. А што е поневеројатно Палас ја забележа првата победа после пет натпревари по ред!
- Ливерпул има 6 порази на 7 натпревари. Во Премиер лига имаат четири порази по ред. Ниту една екипа во Топ5 лигите нема толку порази по ред од 27-ми септември.
ЛИВЕРПУЛ НЕМА ДА ГО ОТПУШТИ СЛОТ
Инсајдерот Фабрицио Романо пишува дека Ливерпул не планира да го смени Арне Слот во најскоро време. Управата и сопственици му веруваат во целост и се 100% сигурни дека холандскиот тренер ќе ја извади екипата од криза.
Играчите, тренерот и управата се во добри односи и наводно се е под контрола.
ДРУГИ НЕОБИЧНИ РЕЗУЛТАТИ
Челси славеше 4-3 против Вулверхемптон на гости. Стана екипа со најмлади четворица стрелци по 19, 20 и 21 година во историјата на англискиот фудбал.
Њукасл го совлада Тотенхем 2-0, Арсенал со ист резултат беше подобар од Брајтон а Манчестер Сити после пресврт 1-3 го доби Свонси.
