Чудесен пресврт се случил во Шефилд, ќе се прераскажува со децении

Како што одминува сезоната и како се познати финалистите во еврокуповите, така во Англија се играат фамозните баражи за пласман во погорна лига. Она што синоќа се случило во Шефилд е за во фудбалски учебници.

Каква вечер за 31.835 навивачи на стадионот „Хилсборо“ на мечот Шефилд Венздеј - Питерборо. Сведочеле најлуд пресврт во историјата на англискиот фудбал.

Во сенка на еврокуповите, на Островот се бијат битки кои носат пласман во погорни лиги и заработки до 100-200 милиони фунти.

Во третата англиска дивизија, позната како Лига 1, во полуфиналето на тамошниот плејоф, Шефилд Венздеј пред неколку дена изгубил од Петерборо со убедливи 4:0.

Кога сите веќе го виделе Петерборо во големото финале за пласман во Чемпионшип и сè било решено, Шефилд Венздеј на реваншот во 25’ минута веќе води со 2-0, а на средината од вториот дел го постигнува и третиот гол во мрежа на гостите.

Следува голема битка, а во осма минута од судиското продолжение Лиам Палмер го постигнува четвртиот гол за домаќините.

Во целосен транс и лудило навивачите уште тогаш влегуваат на терен да слават иако ништо не е готово а вкупниот резултат е израмнет на 4:4.

На сцена следувале продолженија. Петерборо дава гол за 4-1 и верба дека кошмарот им поминал, но Шефилд повторно постигнува погодок за 5-1, конечни 5-5 и пенали.

И таму во пенал-рулетот домаќинот подобро изведува, победува 5-3 и оди во големото финале на „Вембли“ за пласман во силниот Чемпионшип.